"ტყიბულის წერაქვი გაკვეთს რეჟიმის ტყვეების საკნებს" — ამ სლოგანით ტყიბულში მეშახტეების აქცია გაიმართა.

აქციის ერთ-ერთმა მონაწილემ სიტყვის გამოსვლისას თქვა, რომ სისტემა მხოლოდ რუსთაველზე დგომით ვერ ჩამოიშლება, ძალიან მნიშვნელოვანია რეგიონის პროტესტები. მისი თქმით, აქციის მონაწილეები მარშით გადაადგილდებიან ტყიბულის წმინდა გიორგის სახელობის ეკლესიის მიმართულებით, შემდეგ კი დაღუპული მეშახტეების ხსოვნის უკვდავსაყოფად სანთლებს დაანთებენ.

ტყიბულში სოლიდარობის გამოსახატავად მოქალაქეები თბილისიდანაც ჩავიდნენ. მათ შორისაა რეჟისორი დათა თავაძეც.

"დღეს ტყიბულელ მეშახტეებთან ვართ! ერთად ვიბრძვით საერთო მიზნისთვის — მზრუნველი სახელმწიფოსთვის", — წერს ის.

საქნახშირმა 38 მეშახტე გაათავისუფლა 2024 წლის დასასრულს. მეშახტეების ნაწილი მიიჩნევს, რომ მათი გათავისუფლება პოლიტიკური ნიშნით მოხდა.