ოცნების პარლამენტის თავმჯდომარე, შალვა პაპუაშვილი აცხადებს, რომ ევროკავშირის უმეტეს ქვეყანაში ნიღბიანებს არაფერი ესაქმებათ აქციაზე, ცრემლსადენი გაზის გამოყენება კი იმის ნიშანია, რომ ადამიანი უნდა წავიდეს სახლში.

"ევროკავშირის უმეტეს ქვეყანაში ნიღბიანებს არაფერი ესაქმებათ აქციაზე. როცა ცრემლსადენი გაზის გამოყენება ხდება, ხდება იმის გამო, რომ აქცია კანონიერი ჩარჩოებიდანაა გასული. შესაბამისად, როცა სპეციალური საშუალების გამოყენება ხდება, იმის ნიშანია, რომ ადამიანი სახლში უნდა წავიდეს და არა უფრო მეტი წინააღმდეგობა გაუწიოს. ნიღბიანებს არაფერი ესაქმებათ აქციაზე, ნიღბიანების აქცია მე არ გამიგია სადაური წესია, ამას ბევრი მიზეზი აქვს, მათ შორის, რატომაც არის ევროპაში ნიღბების ტარება აკრძალული, გამოდის, რომ თქვენ ევროპას ეძახით რეპრესიულ სივრცეს?", — განაცხადა პაპუაშვილმა.

29 დეკემბერს ოცნების არჩეულმა პრეზიდენტმა, მიხეილ ყაველაშვილმა რეპრესიული კანონებს მოაწერა, რომლებიც ძალაში დღეიდან შევიდა.

კანონში შესული ცვლილებები ასე გამოიყურება:

  • გაზრდილი ჯარიმა დასახლებულ პუნქტში სატრანსპორტო საშუალებებით ორგანიზებულად გზის გადაკეტვის ან ჯგუფურ მოძრაობაში მონაწილეობისთვის, როდესაც გზის სავალი ნაწილი სრულად არის დაკავებული (1000 ლარის ჯარიმა და მართვის უფლების 1 წლით შეჩერება);
  • ჯარიმები მუნიციპალიტეტის ადმინისტრაციულ საზღვრებში არსებული ტერიტორიის იერსახის დამახინჯებისა და ვანდალიზმისთვის (1000 - 3500 ლარამდე);
    ახალი სამართალდარღვევები:
  • შსს-ს სისტემაში დადგენილი ფორმის ტანსაცმლის ან ატრიბუტიკის უკანონოდ ტარება ან/და დადგენილი ფორმის ტანსაცმლისთვის ან ატრიბუტიკისთვის მიმსგავსებული ტანსაცმლის/ატრიბუტიკის ტარება (2000 ლარი, სამართალდარღვევის საგნის კონფისკაციით);
  • შეკრება-მანიფესტაციის დროს პიროტექნიკური ნაწარმის, ლაზერული გამოსხივების ან/და მკვეთრი გამოსხივების მქონე ისეთი საშუალების ქონა, რომლის გამოყენებამ შეიძლება ხელი შეუშალოს სახელმწიფო უწყებების წარმომადგენელთა საქმიანობას ან/და მათ სარგებლობაში არსებულ ტექნიკურ საშუალებათა გამართულ ფუნქციონირებას;
  • ასევე, სახის ნიღბით ან ნებისმიერი სხვა საშუალებით დაფარვა (2000 ლარის ჯარიმა);
  • შეკრებებისა და მანიფესტაციების სხვა წესების დარღვევისთვის გაზრდილი ჯარიმები (500 ლარის ნაცვლად 5000 ლარი, ორგანიზატორზე - 15000 ლარი).