კრემლის პრესსამსახურის მიერ გავრცელებული ინფორმაციით, ვლადიმერ პუტინმა ილჰამ ალიევს "აზერბაიჯანის ავიახაზების" თვითმფრინავის ჩამოვარდნის გამო ბოდიში მოუხადა.

რუსეთის პრეზიდენტმა ვლადიმერ პუტინმა, აზერბაიჯანელ კოლეგას, ილჰამ ალიევს "აზერბაიჯანის ავიახაზების" თვითმფრინავის ჩამოვარდნის გამო ბოდიში მოუხადა.

ამის შესახებ ინფორმაციას კრემლის პრესსამსახური ავრცელებს.

აღნიშნულ ინფორმაციაში წერია, რომ პუტინმა ალიევთან სატელეფონო საუბარში რუსეთის საჰაერო სივრცეში მომხდარი "ტრაგიკული ინციდენტის" გამო ბოდიში მოიხადა. რუსეთის პრეზიდენტმა თანაგრძნობა გამოუცხადა დაღუპულთა ოჯახებს, ხოლო დაშავებულებს სწრაფი გამოჯანმრთელება უსურვა.

ამასთან, პუტინმა აღნიშნა, რომ "აზერბაიჯანის ავიახაზების" თვითმფრინავი გროზნოში დაშვებას "უკრაინული დრონებისა შეტევისა და რუსული საჰაერო თავდაცვის სისტემების მუშაობის დროს ცდილობდა".

"თვითმფრინავმა გროზნოს აეროპორტში დაშვება არაერთხელ სცადა. ამ დროს გროზნოს, მოზდოკსა და ვლადიკავკაზს უკრაინული დრონები ესხმოდნენ თავს და რუსეთის საჰაერო თავდაცვის სისტემები ამ თავდასხმებს იგერიებდნენ", — ნათქვამია კრემლის მიერ გავრცელებულ ინფორმაციაში.

შეგახსენებთ, 25 დეკემბერს ყაზახეთის ქალაქ აქთაუში "აზერბაიჯანის ავიახაზების“ თვითმფრინავის ჩამოვარდნის შედეგად 38 ადამიანი დაიღუპა.

მოგვიანებით, Euronews-ს ექსკლუზიურად დაუდასტურეს აზერბაიჯანის სამთავრობო წყაროებმა, რომ წინასწარი გამოძიების შედეგად, აზერბაიჯანის ავიახაზების“ თვითმფრინავის ავიაკატასტროფა რუსულმა მიწა-ჰაერის ტიპის რაკეტამ გამოიწვია.