აშშ-მა 20-მდე ქართველ მაღალჩინოსანს სავიზო შეზღუდვები დაუწესა. ამის შესახებ აშშ-ს სახელმწიფო მდივნის, ენტონი ბლინკენის განცხადებაშია ნათქვამია, რომელიც სახელმწიფო დეპარტამენტის ოფიციალურ ვებგვერდზე დღეს გამოქვეყნდა.

წერილში ნათქვამია, რომ აშშ მკაცრად გმობს ქართული ოცნების მიერ მიმდინარე, სასტიკ და გაუმართლებელ ძალადობას საქართველოს მოქალაქეების, მათ შორის მომიტინგეების, მედიის წარმომადგენლების, უფლებადამცველების და ოპოზიციის მიმართ. ბლინკენის თქმით, დღევანდელი გადაწყვეტილება აშშ-ს დამატებითი ზომებია იმ პირების მიმართ, ვინც პასუხისმგებელია ქვეყანაში არსებულ ძალადობისა და დემოკრატიის შელახვაზე. წერილში ასევე ნათქვამია, რომ აშშ-მა ქართულ ოცნებასთან აფილირებულ 100-ზე მეტ პიროვნებას და მათი ოჯახის წევრს შეზღუდვები უკვე დაუწესა.

აღსანიშნავია ისიც, რომ სახელმწიფო დეპარტამენტის ვებგვერდზე გამოქვეყნებულ განცხადებაში არ არის ნახსენები "საქართველოს ხელისუფლება", ან "საქართველოს მთავრობა", აშშ-ს სახელმწიფო მდივანი მხოლოდ "ქართულ ოცნებას" ახსენებს.

"სახელმწიფო დეპარტამენტი დღეს აცხადებს დამატებით მოქმედებას სავიზო შეზღუდვის პოლიტიკის ფარგლებში, რომელიც კრძალავს ვიზის გაცემას მათთვის, ვინც პასუხისმგებელია ან თანამონაწილეა და ძირს უთხრის დემოკრატიას საქართველოში. დღევანდელი ქმედება შეეხება დაახლოებით ოცი პიროვნებას, მათ შორის იმ პირებს, რომლებიც მსახურობენ მინისტრებად და პარლამენტში, სამართალდამცავ და უშიშროების წარმომადგენლებს და კერძო მოქალაქეებს.

შეერთებული შტატები მკაცრად გმობს ქართული ოცნების მიერ მიმდინარე, სასტიკ და გაუმართლებელ ძალადობას საქართველოს მოქალაქეების, მათ შორის მომიტინგეების, მედიის წარმომადგენლების, უფლებადამცველების და ოპოზიციის მიმართ. ქართულმა ოცნებამ გადაუხვია საქართველოს ევროატლანტიკურ მომავალს, რომელიც ქართველ ხალხს უზომოდ სურს და საქართველოს კონსტიტუცია ითვალისწინებს. ჩვენ ვესწრაფვით, დავინახოთ მაღალი თანამდებობის პირები, რომლებიც პასუხისმგებელნი არიან დემოკრატიის შელახვაში, დაექვემდებარებიან სავიზო შეზღუდვებს.

ჩვენ ვამზადებთ დამატებით ქმედებებს, მათ შორის სანქციებს, რათა პასუხი აგონ მათ, ვინც ძირს უთხრის დემოკრატიას საქართველოში. ქართველი ხალხის გვერდით ჩვენ გვინდა ვიხილოთ, ევროატლანტიკურ საზოგადოებაში მტკიცედ ინტეგრირებული, ძლიერი, აყვავებული და დემოკრატიული საქართველო. ჩვენი დღევანდელი ქმედებები გამოხატავს აშშ-ს გადაწყვეტილებას და დამატებითი ზომებია ადრე გამოცხადებულ ქმედებებზე, რომლებიც ქართულ ოცნებასთან აფილირებულ 100-ზე მეტ პიროვნებას და მათი ოჯახის წევრს ეხება", — ნათქვამია გავრცელებულ განცხადებაში.