აშშ-ის სენატის საგარეო ურთიერთობათა კომიტეტში გამართულ მოსმენაზე სენატორმა ჯინ შაჰინმა საქართველოში არსებულ სიტუაციაზე ისაუბრა.

"მნიშვნელოვანია გავუშვათ გზავნილი, რომ სენატსა და კონგრესში არის ორპარტიული კონსენსუსი ამ [ძალადობის] საკითხზე საქართველოსთან მიმართებით და რომ არ ვაპირებთ უმოქმედოდ შევეგუოთ ადამიანის უფლებების მძიმე დარღვევებს, რომლებიც ქვეყანაში ხდება. ვიმედოვნებ, პრემიერმინისტრი და მმართველი პარტია მიიღებენ ამ გზავნილს" — განაცხადა ჯინ შაჰინმა

სენატის საგარეო ურთიერთობათა კომიტეტში გამართულ მოსმენაზე მოწმის სტატუსში მონაწილე ამერიკელმა ბიზნესმენმა სერ უილიამ ბრაუდერმა ხაზი გაუსვა ამერიკელი კანონმდებლების როლს ნებისმიერი პრეზიდენტის ადმინისტრაციის იძულებაში, მიიღონ სწორი გადაწყვეტილებები მსოფლიოში ადამიანის უფლებების დაცვის ხელშეწყობისთვის. უილიამ ბრაუდერმა საქართველოზე და კონკრეტულად ბიძინა ივანიშვილზეც ილაპარაკა.

"სად იშოვნა მან ფული? — რუსეთში. როგორ იშოვნა მან ფული რუსეთში? — "გაზპრომისა" და სხვა სახელმწიფო კომპანიების საშუალებით, რომლებიც, ჩემი გამოცდილებით, უკიდურესად კორუფციულია. მან იშოვნა რამდენიმე მილიარდი. დაბრუნდა საქართველოში და როგორ აკონტროლებენ მას რუსები? — ისინი ეუბნებიან: შენ ფული იშოვნე იმ გზით, რომელიც პოტენციურად საეჭვოა. ჩვენ შეგვიძლია ყველაფერი ჩამოგართვათ, აღვძრათ სისხლის სამართლის საქმეები შენს წინააღმდეგ და ყველანაირ გზას მივმართოთ ან შეგვიძლია არაფერი არ გავაკეთოთ, თუ დაგვეხმარები. რა გააკეთა მან? — დაეხმარა მათ და მას შემდეგ აქტიურად ეხმარება და ვფიქრობ, სამართლიანი იქნება იმის თქმა, რომ საქართველოს ახლანდელი არალეგიტიმური მთავრობა არის რუსეთის მარიონეტი მთავრობა და სამართლიანი იქნება ითქვას, რომ ბატონი ივანიშვილი მთელ ამ სიტუაციაში ძალიან აქტიურ როლს ასრულებს.

ეს არის ერთი მაგალითი, როგორ მუშაობს კორუფცია. მეორე მაგალითია ის, რომ ამ ხალხს, რომელიც კორუმპირებულია, რომელიც ხელისუფლებაშია, არ სურთ შემდეგმა მთავრობამ გამოიძიოს მათი საქმეები. ამიტომ, რას შვრებიან? — ისინი არ თმობენ ძალაუფლებას. ამას აკეთებენ ბიულეტენების ყუთებში ჩატენვით, არჩევნების გაყალბებით და ა.შ. ყველაფერი ეს სრულად ურთიერთგადაჯაჭვულია. ამიტომაც არის კორუფცია ასეთი მნიშვნელოვანი", — განაცხადა უილიამ ბრაუდერმა