ერთიანი ნაციონალური მოძრაობის მერობის კანდიდატი ზაალ უდუმაშვილი ხელმოწერების შეგროვებაში ალეკო ელისაშვილს დახმარებას სთავაზობს. უდუმაშვილის თქმით, თანხმობის შემთხვევაში მისი შტაბი ხვალ დილიდან დაიწყებს მხარდამჭერების მობილიზებას:

"ხელისუფლება საარჩევნო მანიპულაციებით ცდილობს მის [ელისაშვილი] არჩევნებში მონაწილეობას სერიოზული პრობლემები შეუქმნას. საუბარია კანონში შეტანილ ცვლილებებზე, რომლის მიხედვით ალეკო ელისაშვილი ვალდებულია ერთი კვირის განმავლობაში 10 ათასი ხელმოწერა წარადგინოს. მე ვაცხადებ, რომ ჩემი და ჩემი გუნდის მთავარი ამოცანაა ოქტომბერში დავასრულოთ თბილისში ქართული ოცნება. ამისთვის კი აუცილებელია ქვეყანაში ჩავატაროთ სამართლიანი და კონკურენტუნარიანი არჩევნები.

მერობის კანდიდატმა თქვა, რომ მისი შტაბი მზადაა უმოკლეს ვადაში შეაგროვოს 10 ათასი ხელმოწერა და იმავეს გაკეთებისკენ მოუწოდებს "პროდასავლურ კანდიდატს".

თბილისის საკრებულოს დამოუკიდებელმა კანდიდატმა, ალეკო ელისაშვილმა, რომელსაც თბილისის მერობა სურს, ფეისბუქით გაავრცელა ინფორმაცია, რომ ცესკომ "უსინდისო გადაწყვეტილება მიიღო". მისი თქმით, მას 10 ათასი ხელმოწერის წარსადგენად ცესკომ შვიდდღიანი ვადა მისცა.

როგორც მერობის მსურველი ამბობს, ცესკოს შეეძლო მისთვის ხელმოწერების წარსადგენად ერთთვიანი ვადა მიეცა, თუმცა ყველაზე მცირე პერიოდი - ერთი კვირა გამოყო.

ცესკო ალეკო ელისაშვილის განცხადებას გამოეხმაურა და თქვა, რომ კანდიდატების რეგისტრაციის პროცედურასთან დაკავშირებით მცდარი ინფორმაცია გავრცელდა და ხელმოწერების შეგროვებისა და საარჩევნო კომისიაში წარდგენის ბოლო ვადას ადგენს არა ცესკო, არამედ უშუალოდ საარჩევნო კოდექსი.