ხუთი არასამთავრობო ორგანიზაცია საკონსტიტუციო რეფორმასთან დაკავშირებით დაგეგმილ კონსულტაციებზე განცხადებას ავრცელებს, სადაც ნათქვამია, პირველ რიგში აუცილებელია კონსენსუსი შედგეს საპარლამენტო საარჩევნო სისტემის გარშემო:

"მიგვაჩნია, რომ საკვანძო საკითხს კონსტიტუციის პროექტში პროპორციულ საარჩევნო სისტემაზე 2020 წელს გადასვლა წარმოადგენს. პროპორციულ საარჩვნო სისტემაზე გადასვლამ მხარდაჭერა მოიპოვა საკონსტიტუციო კომისიის ფორმატში."

არასამთავრობოები აცხადებენ, რომ შეთანხმების მიუღწევლობისა და არასამართლიანი საარჩევნო სისტემის შენარჩუნების პირობებში, ქვეყანა ერთი პარტიის მიერ მიღებულ კონსტიტუციას მიიღებს:

"ეს გააღვივებს პოლიტიკურ დაპირისპირებას, გაზრდის დაძაბულობას პოლიტიკურ პარტიებს შორის, დააზიანებს ქვეყნის რეპუტაციას, შეაფერხებს ქვეყნის სტაბილურ განითარებასა და საქართველოს ევროატლანტიკურ სტრუქტურებთან დაახლოებას".

მათივე განცხადებით, კვლავ პრობლემურია დებულებები პრეზიდენტის არჩევის, მართლმსაჯულებისა და ადამიანის უფლებების შესახებ, მივიჩნევთ, რომ პირველ რიგში აუცილებელია კონსენსუსი შედგეს საპარლამენტო საარჩევნო სისტემის გარშემო.

არასამთავრობოები მოუწოდებენ მხარეებს არ იხელმძღვანელონ ვიწრო პარტიული პოზიციებიდან გამომდინარე და გადაწყვეტილება მიიღონ ქვეყნის ინტერესების შესაბამისად.

დღეს, 18 აგვისტოს, მმართველი და ოპოზიციური პარტიების მონაწილეობით დაგეგმილია კონსულტაციები საკონსტიტუციო რეფორმასთან დაკავშირებით.

განცხადებაზე ხელმომწერი ორგანიზაციები არიან:

  • საერთაშორისო გამჭვირვალობა - საქართველო
  • სამართლიანი არჩევნების და დემოკრატიის საერთაშორისო საზოგადოება (ISFED)
  • სამოქალაქო განვითარების სააგენტო (Cida)
  • ლიბერალური აკადემია თბილისი
  • ინფორმაციის თავისუფლების განვითარების ინსტიტუტი (IDFI)