აზერბაიჯანელი ჟურნალისტი, აფგან სადიგოვი ციხის სამედიცინო დაწესებულებაში გადაიყვანეს, — ამის შესახებ ინფორმაციას სოციალური სამართლიანობის ცენტრის დირექტორი თამთა მიქელაძე ავრცელებს.

მიქელაძის თქმით, უკანონოდ დაკავებული აზერბაიჯანელი ჟურნალისტის ჯანმრთელობის მდგომარეობა უკიდურესად დამძიმდა.

"როგორც მოსალოდნელი იყო, აფგან სადიგოვის ჯანმრთელობის მდგომარეობა უკიდურესად დამძიმდა. მეუღლეს ახლა შეატყობინეს, რომ ციხის სამედიცინო დაწესებულებაში გადაიყვანეს დაუძლურებული პატიმარი. არაადამიანურია, რაც ამ პატიოსანი ჟურნალისტის და მისი ოჯახის თავს ხდება. ორივე მთავრობას დანაშაულებრივად აქვს პირი შეკრული ჟურნალისტების ოჯახის წინააღმდეგ და ყველაფერს კადრულობს.

მნიშვნელოვანია, ჩვენმა საზოგადოებამ ერთსულოვანი სოლიდარობა ვაჩვენოთ სადიგოვების ოჯახის მიმართ. ამ საქმეზე უფრო დეტალურ ინფორმაციას უახლოეს დღეებში მივაწვდით საზოგადოებას და მედიას." — წერს მიქელაძე სოციალურ ქსელში.

ცნობისთვის, აზერბაიჯანელი ჟურნალისტი მე-17 დღეა საპატიმროში შიმშილობს.

ჟურნალისტმა პროტესტის უკიდურეს ფორმას 21 სექტემბერს მიმართა, მას შემდეგ, რაც შინაგან საქმეთა სამინისტროს მიგრაციის დეპარტამენტმა, 2024 წლის 16 სექტემბერს, უარი უთხრა საერთაშორისო დაცვაზე საქართველოში