საქართველოს ეროვნული ბანკის პრეზიდენტის მოვალეობის შემსრულებელი ნათია თურნავა ოფიციალური ვიზიტით ყაზახეთში იმყოფება, სადაც ყაზახეთის ეროვნულ ბანკის პრეზიდენტს ტიმურ სულეიმანოვს შეხვდა და ურთიერთთანამშრომლობის მემორანდუმი გააფორმა.

შეხვედრაზე საქართველოსა და ყაზახეთის ეროვნული ბანკის ხელმძღვანელებმა ხაზი გაუსვეს შემდგომი თანამშრომლობის აუცილებლობას, რომელიც შუა დერეფნის ქვეყნებს შორის ფინანსური სექტორის განვითარებას უკავშირდება.

"შეთანხმება ეხება მჭიდრო თანამშრომლობის ხელშეწყობას ისეთ ძირითად სფეროებში, როგორიცაა ცენტრალური ბანკის საქმიანობა, საგადახდო სისტემები, ფინანსური მომსახურება. ამ სტრატეგიული პარტნიორობის შექმნა უფრო ინტეგრირებული და თანამშრომლობაზე დაფუძნებული რეგიონული ეკონომიკისკენ წაგვიყვანს, რომელსაც შეუძლია, ახლანდელი გლობალური ეკონომიკური გარემოს სირთულეებში ეფექტურად გაიკვლიოს გზა", - განაცხადა ნათია თურნავამ.

შეგახსენებთ, გუშინ 18 სექტემბერს, საქართველოს ეროვნულმა ბანკმა გაავრცელა ცნობა, რომ ის იცავს და დაიცავს საერთაშორისო სანქციებს, მაგრამ საქართველოს მოქალაქესთან დაკავშირებით ეროვნული ბანკი იხელმძღვანელებს საქართველოს ეროვნული ბანკის პრეზიდენტის 2023 წლის 4 აგვისტოს №208/04 ბრძანების მიხედვით.

აღნიშნული ბრძანების თანახმად, საქართველოს მოქალაქეზე სანქციათა რეჟიმი ვრცელდება იმ შემთხვევაში თუ დაწესებული სანქციების საფუძველთან დაკავშირებით გამოტანილია საქართველოს სასამართლოს კანონიერ ძალაში შესული გამამტყუნებელი განაჩენი.

მსგავს მიდგომას დიდ საფრთხედ აფასებენ საბანკო სამართლის სპეციალისტები, რადგან ის ეჭვქვეშ აყენებს საქართველოს ფინანსური სექტორის ერთგულებას საერთაშორისო სანქციათა რეჟიმის მიმართ, რაც აღნიშნულ სექტორს თავად უქმნის დასანქცირების რისკს.