პარლამენტის თავმჯდომარე, ირაკლი კობახიძე აშშ-ის ვიცე-პრეზიდენტის, მაიკ პენსის ვიზიტთან დაკავშირებით, ფეისბუქის საკუთარ გვერდზე წერს, რომ ვიცე-პრეზიდენტმა მტკიცე მეგობრული გზავნილები გადასცა საქართველოს. მისივე თქმით, მაიკ პენსის ვიზიტმა დაადასტურა, რომ ამერიკის შეერთებული შტატები საქართველოს, რეგიონში მთავარ მოკავშირედ, სანდო პარტნიორად და ერთგულ მეგობრად განიხილავს.

კობახიძის განცხადებით, პრეზიდენტის ახალი ადმინისტრაციის მაღალი ინტერესი საქართველოს მიმართ არის ნათელი გზავნილი, რომ ამერიკის შეერთებული შტატები არ აპირებს საქართველოს მარტო დატოვებას რთული გამოწვევების წინაშე.

"ვიცე-პრეზიდენტმა ხაზგასმით აღნიშნა, რომ აშშ-ს ახალი ადმინისტრაცია გეგმავს აქტიურ თანამშრომლობას მოქმედ ხელისუფლებასთან და მმართველ პოლიტიკურ გუნდთან. ეს არის საქართველოს ხელისუფლების საქმიანობის უპრეცედენტო შეფასება, რომელიც გვაკისრებს უდიდეს პასუხისმგებლობას, გავაგრძელოთ დემოკრატიული რეფორმების განხორციელება".

აშშ-ის ვიცე-პრეზიდენტი, მაიკ პენსი თბილისში 31 ივლისსა და 1 აგვისტროს ოფიციალური ვიზიტით იმყოფებოდა. მან საქართველოში ყოფნისას, გიორგი კვირიკაშვილთან ერთად, გამართულ პრესკონფერენციაზე ყურადღება გაამახვილა სტრატეგიულ პარტნიორობაზე, რუსეთის მიმართ დაწესებულ სანქციებზე, ოკუპირებულ ტერიტორიებზე, ეკონომიკურ თანამშრომლობასა და ნატოსთან ინტეგრაციაზე.