თბილისის საქალაქო სასამართლოს ყოფილი თავჯდომარე, მამუკა ახვლედიანი ნიკა გვარამიას განცხადებასთან დაკავშირებით, რომ რუსთავი 2-ის საქმეს არაუფლებამოსილი მოსამართლეთა კოლეგია განიხილავდა, სააპელაციო სასამართლოსგან განმარტებებს ითხოვს:

"სისხლიდან სამოქალაქოში გადაყვანას აუცილებლად სჭირდება დოკუმენტი და კოლეგიის შემადგენლობაში მოსამართლის შეცვლასაც აუცილებლად სჭირდება დოკუმენტი. მაინტერესებს, რის საფუძველზე, რომელ კანონზე დაყრდნობით გამოიტანა სააპელაციო სასამართლოს თავჯდომარემ ეს გადაწყვეტილება. ზუსტად ანალოგიური ხდება უზენაეს სასამართლოშიც".

მისი თქმით, თუ ზემოაღნიშნულის გაკეთების უფლება აქვს სასამართლოს თაჯდომარეს, მაშინ ასევე გაუგებარია, თავად ის რატომ გადააყენა იუსტიციის უმაღლესმა საბჭომ:

"ამ ადამიანებს სახე არ აქვთ, მითუმეტეს დღევანდელ იუსტიციის უმაღლეს საბჭოს. მათ რაც სჭირდებათ და რა დროს, რა უნდათ, ისე იქცევიან. მათ არც სახელმწიფო აინტერესებთ, არც კანონი აინტერესებთ და საერთოდ, ინტერესის სფერო მხოლოდ თავიანთი კეთილდღეობაა".

გუშინ, 9 ივნისს, რუსთავი 2-ის გენერალურმა დირექტორმა განაცხადა, რომ თბილისის სააპელაციო სასამართლოს მოსამართლეთა კოლეგია, რომელმაც რუსთავი 2-ის საქმე განიხილავდა, არაუფლებამოსილია განიხილოს სამოქალაქო დავა:

"იუსტიციის უმაღლესი საბჭოდან რუსთავი 2-ის წერილის პასუხად, დღეს მიღებული დოკუმენტებით ირკვევა, რომ მოსამართლეთა კოლეგიის წევრმა შორენა ყაველაშვილმა 2005 წლის 18 ივნისს მოსამართლეთა საკვალიფიკაციო გამოცდა ჩააბარა სისხლის სამართლის სპეციალიზაციით, კანონის თანახმად კი, ყავლაშვილს არ ჰქონდა უფლება, ყოფილიყო იმ კოლეგიის შემადგენლობაში, რომელიც რუსთავი 2-ის სამოქალაქო დავას იხილავდა".