პარტია ლელოს ლიდერებმა, მამუკა ხაზარაძემ და ბადრი ჯაფარიძემ, ანაკლიის პორტის საქმეზე დაწყებული დავა საერთაშორისო საარბიტრაჟო სასამართლოში, წააგეს.

ამის შესახებ განცხადებას ანაკლიის განვითარების კონსორციუმი (ADC) ავრცელებს.

განცხადების მიხედვით, საარბიტრაჟო გადაწყვეტილებასა და საარბიტრაჟო პროცესთან დაკავშირებული დეტალები კონფიდენციალურია.

"არბიტრაჟის მიერ მიღებული გადაწყვეტილება გულდასაწყვეტია. ჩვენ კვლავაც გვჯერა, რომ საქართველოს მთავრობა მოქმედებდა არასწორად, საქართველოს მოქალაქეების ინტერესების საზიანოდ, როდესაც ცდილობდა ანაკლიის პორტის პროექტისთვის ზიანის მიყენებას, რამაც შედეგად გამოიწვია პორტის პროექტის თითქმის ათწლეულით დაყოვნება, ათასობით სამუშაო ადგილისა და შემოსავლების დაკარგვა საქართველოსთვის", — ვკითხულობთ განცხადებაში.

განცხადების მიხედვით, ADC-ის სარჩელი ეხებოდა 2020 წლის იანვარში ანაკლიის ღრმაწყლოვანი პორტის განვითარების მიზნით, ADC-სა და საქართველოს მთავრობას შორის დადებული საინვესტიციო ხელშეკრულების შეწყვეტის უკანონობას და ADC-სა და მისი ინვესტორების მიერ განხორციელებული ინვესტიციის ანაზღაურებას.

გუშინ, 29 ივლისს, განცხადებას გამოეხმაურა მამუკა ხაზარაძე, რომელიც ანაკლიის განვითარების კონსორციუმის დამფუძნებელია.

"არბიტრაჟის მიერ მიღებული გადაწყვეტილება გულდასაწყვეტია იმდენად, რამდენადაც ქართველებისთვის ათიათასობით სამუშაო ადგილი დაიკარგა", — წერს ხაზარაძე.