საფრანგეთი, საპარლამენტო არჩევნების შემდეგ, პოლიტიკური ჩიხის საფრთხის წინაშე დგას. ულტრამემარჯვენე ეროვნული გაერთიანება დამარცხდა, თუმცა უმრავლესობა ვერცერთმა პარტიამ ვერ მოიპოვა.

ულტრამემარჯვენეებმა, ხმების მიხედვით, მესამე ადგილი დაიკავეს — მათ წინ არის მემარცხენე ალიანსი და ემანუელ მაკრონის ცენტრისტული ალიანსი.

იმის გამო, რომ მაკრონის პარტიამ ვერ შეძლო უმრავლესობის მოპოვება, ქვეყნის პრემიერ-მინისტრმა, გაბრიელ ატალმა განაცხადა, რომ დღეს თანამდებობას დატოვებს.

გაიგე მეტი: ვინ არის საფრანგეთის ყველაზე ახალგაზრდა და პირველი ღიად გეი პრემიერ-მინისტრი

რადგან არცერთ პარტიას არ მიუღია საკმარისი ადგილები პარლამენტში აბსოლუტური უმრავლესობისთვის, პალატა გაიყოფა სხვადასხვა პოლიტიკურ ჯგუფს შორის, საკვანძო საკითხებზე განსხვავებული პოზიციებით.

შექმნილმა მდგომარეობამ, შესაძლოა, ქვეყანაში ქაოსი შექმნას რამდენიმე კვირის განმავლობაში, რათა მოხერხდეს შეთანხმება პრემიერ-მინისტრის კანდიდატურასთან დაკავშირებით. ემანუელ მაკრონს კი, რომლის პოპულარობა საფრანგეთში სულ უფრო იკლებს, შესაძლოა, მუშაობა მოუხდეს პრემიერ-მინისტრთან ერთად, რომელიც მისი ცენტრისტული პოლიტიკის წინააღმდეგი იყოს.

მაკრონის ოფისში აცხადებენ, რომ პრეზიდენტი "დაელოდება ახალი ეროვნული ასამბლეის ჩამოყალიბებას“, ვიდრე ახალი მთავრობის შექმნაზე დაიწყებს მუშაობას.

ეროვნული ასამბლეა, პლენარული სხდომისთვის პირველად 18 ივლისს შეიკრიბება.