ნაციონალური მოძრაობის თბილისის მერობის კანდიდატი, ზალიკო უდუმაშვილი ლგბტ თემის უფლებებზე საუბრისას ამბობს, რომ ყველა ადამიანის უფლებები ერთნაირად უნდა იყოს დაცული. ეს უდუმაშვილმა On.ge-სთან ინტერვიუს დროს განცხადა.

On.ge დაინტერსდა, მერად არჩევის შემთხვევაში, ტრანსფობიისა და ჰომოფობიის წინააღმდეგ აქციის მიმართ, რომელიც ყოველ წელს, 17 მაისის იმართება, გამოხატავს თუ არა საჯარო მხარდაჭერას. აღნიშნულის საპასუხოდ უდუმაშვილმა თქვა, რომ ადამიანის უფლებების დაცვა არის უზენაესი.

ღია მხარდაჭერაზე გეკითხებით.

რთულია ასე საუბარი. მე ვიძახი, რომ ყველა ადამიანის უფლებები უნდა იყოს ერთნაირად დაცული. შესაბამისად, იქ, სადაც ირღვევა ადამიანის უფლებები, იქ უნდა იდგეს თბილისის მერი იმ ხალხის დასაცავად, ვისი უფლებებიც ირღვევა.

ანუ საჯაროდ გამოხატავთ თქვენს პოზიციას?

კი, რა თქმა უნდა, სადაც დაირღვევა ადამიანის უფლებები, მერი უნდა იდგეს სადარაჯოზე. თბილისის მერი არის არა მეურნე, როგორც ბიძინა ივანიშვილი გვიმტკიცებდა, არამედ, არის ერთ-ერთი ყველაზე მაღალი ლეგიტიმაციის მქონე პირი, მისი პოლიტიკური ვალდებულებაცაა დაიცვას ყველა თავისი თანამოქალაქე.

როგორ გგონიათ, ამ შემთხვევაში თქვენი რეიტინგი დაიწევს?

არ აქვს მნიშვნელობა პოლიტიკურ რეიტინგს. ღირებულებები უფრო მაღლა დგას, ვიდრე პოლიტიკური რეიტინგი, მე ასე ვფიქრობ.

ვრცელ ინტერვიუს ზალიკო უდუმაშვილის შეხედულებებთან და სამომავლო გეგმებთან დაკავშრებით, შეგიძლიათ გაეცნოთ აქ. On.ge ეტაპობრივად შემოგთავაზებთ ინტერვიუებს თბილისის მერობის ყველა კანდიდატთან.