მოკლედ: გორის სახელმწიფო უნივერსიტეტის სტუდენტების ნაწილი განცხადებას ავრცელებს და სოლიდარობას უცხადებს სტუდენტებს, რომლებიც რუსული კანონის საწინააღმდეგო აქციებში მონაწილეობენ და პროტესტის ნიშნად, გაფიცულები არიან.

დეტალები: მათი თქმით, ევროპული ოჯახის წევრობა საქართველოს ისტორიული არჩევანია, ამიტომ ეწინააღმდეგებიან ყველაფერს, რაც ხელისშემშლელი იქნება ევროკავშირისკენ მიმავალ გზაზე.

  • "მკაფიოდ ვაცხადებთ, რომ ვდგავართ ჩვენი ქვეყნის გვერდით ევროკავშირისკენ მიმავალ გზაზე და არავის მივცემთ უფლებას გადაუხვიოს საქართველოს კონსტიტუციის 78-ე მუხლს, რომელიც კონსტიტუციურ ორგანოებს ევროპული და ევროატლანტიკური კურსის მტკიცე ერთგულებას ავალებს", — წერია განცხადებაში.
  • ამ ეტაპზე, განცხადებას ხელს აწერს 250-ზე მეტი სტუდენტი, თუმცა ხელმომწერთა სია განახლებადია და რაოდენობა იზრდება.
  • სტუდენტები, ასევე, აღნიშნავენ, რომ მათ მიერ გავრცელებული განცხადება არ გამოხატავს გორის სახელმწიფო უნივერსიტეტისა და უნივერსიტეტის თვითმმართველობის პოზიციას.

კონტექსტი: რუსული კანონის წინააღმდეგ სტუდენტების მასშტაბური გაფიცვა 11 მაისს თსუ-ს სტუდენტებმა დაიწყეს, 14 მაისის მონაცემებით კი, ამჟამად საქართველოს 30-ზე მეტი უნივერსიტეტის სტუდენტები არიან გაფიცულები.

ასევე ნახეთ: სულხან-საბა ორბელიანის უნივერსიტეტში სასწავლო პროცესი შეჩერებულია — აკადემიური საბჭო.

ბათუმის სამი საჯარო და ერთი კერძო სკოლის მოსწავლეები, რუსული კანონის გასაპროტესტებლად გაიფიცნენ