რა ხდება: საქართველოს პარლამენტის პლენარულ სხდომაზე, სადაც რუსულ კანონს მესამე მოსმენით განხილავენ, პერიოდულად სიტყვიერი დაპირისპირებაა და მოჰყვა ხელჩართული ჩხუბიც.

• ოპოზიციონერმა დეპუტატებმა მწვავე პოლიტიკურ განცხადებები გააკეთეს, რასაც ოცნების დეპუტატების მხრიდან, სიტყვიერ შეურაცხყოფა და ფიზიკური დაპირისპირება მოჰყვა.
• ფიზიკური დაპირისპირება ლევან ხაბეიშვილის სიტყვით გამოსვლის შემდეგ მოხდა.

ლევან ხაბეიშვილი: "დღეს ხელისუფლებაში არის ხარება და რობოკოპები, როლებიც თქვენ გიცავენ და რომელთა გარეშე პარლამენტში ვერც შემოიპარები და ვერც გაიპარებით. თქვენ რომ პარლამენტში მოხვიდეთ, ამისთვის ათეულობით ახალგაზრდებს ულეწავენ თავისქალას და აკავებენ", — მიმართა ერთიანი ნაციონალური მოძრაობის თავმჯდომარემ ქართულ ოცნებას.

• ხაბეიშვილის თქმით, ახალგაზრდებს, მმართველი პარტიისგან მიყენებული ფიზიკური დაზიანებები შეუხორცდებათ, მაგრამ ოცნების რეპუტაცია აღარასდროს აღდგება.
• "უკაცრავად, მაგრამ არ უყურეთ გუშინ, ე.წ სპეცრაზმი ომონი რუსეთში რასაც აკეთებს, იგივე გააკეთეს ქართველის წინააღმდეგ. რამდენიმე ათეული ერთად სცემდა ახალგაზრდებს".

ასევე, სიტყვით გამოვიდნენ ოპოზიციონერი დეპუტატი ანა ნაცვლიშვილი და საპარლამენტო ფრაქცია ერთიანი ნაციონალური მოძრაობის თავმჯდომარე თინა ბოკუჩავა.

• თინა ბოკუჩავა: "ცდილობთ დაამახინჯოთ და შებღალოთ ილიას სიტყვები, ვინ ციტირებს ილიას სიტყვებს, ბიძინა ივანიშვილი? მოღალატე რუსი ოლიგარქი? რომლისთვისაც მთავარი სიწმინდე მისი ფულია და მისი მილიარდების დასაცავად, მზად არის ივაჭროს ჩვენიო ქვეყნის ნათელი და ევროპული მომავლით".

• ანა ნაცვლიშვილი: "ამ ადამიანების წინააღმდეგ თქვენ არ დაიშურეთ არც ხელკეტები, არც რეზინის ტყვიები, არც გაზი, არც წყლის ჭავლი, არც ძალადობა და არც უკანონობა, მაგრამ ეს ადამიანები დგანან მედგრად, ერთად და ეუბნებიან თქვენ რუს ოლიგარქს არ გაგატანთ ამ ქვეყანას რუსეთში! ჩვენ იმისთვის არ გაგვიჩენია შვილები საქართველოში, რომ მათ რუსეთში გაიღვიძონ".
• ანა ნაცვლიშვილი, პარლამენტის პლენარულ სხდომაზე აირწინაღითა და ცრემლსადენი გაზისგან დამცავი სათვალით მივიდა.

კონტექსტი: დღეს, 2024 წლის 14 მაისს, საქართველოს პარლამენტმა რუსული კანონი მესამე, საბოლოო მოსმენით განხილვა დაიწყო.

• მესამე, საბოლოო მოსმენა ითვალისწინებს კანონპროექტის ტექნიკურ-რედაქციული შინაარსის განხილვას. ამ პროცესის შემდეგ პარლამენტის მესამე მოსმენით მხარდაჭერა კანონპროექტის მიღებას ნიშნავს და ის შემდეგ ხელმოსაწერად საქართველოს პრეზიდენტს გაეგზავნება.
• ცნობილია, რომ პრეზიდენტი რუსულ კანონს დაადებს ვეტოს, თუმცა, საპარლამენტო უმრავლესობას შეუძლია მისი დაძლევა.