რა ხდება: დღეს, 2024 წლის 14 მაისს, საქართველოს პარლამენტმა რუსული კანონი მესამე, საბოლოო მოსმენით განხილვა დაიწყო.

რას ნიშნავს ეს: მესამე, საბოლოო მოსმენა ითვალისწინებს კანონპროექტის ტექნიკურ-რედაქციული შინაარსის განხილვას. ამ პროცესის შემდეგ პარლამენტის მესამე მოსმენით მხარდაჭერა კანონპროექტის მიღებას ნიშნავს და ის შემდეგ ხელმოსაწერად საქართველოს პრეზიდენტს გაეგზავნება. ცნობილია, რომ პრეზიდენტი რუსულ კანონს დაადებს ვეტოს, თუმცა, საპარლამენტო უმრავლესობას შეუძლია მისი დაძლევა.

რა ვითარებაა ახლა პარლამენტთან: საპოლიციო ძალების დახმარება გამოიყენეს ქართული ოცნების დეპუტატებმა პარლამენტში შესასვლელად, იქ მიმდინარე პროტესტის გამო. სამართალდამცავებმა გადაკეტეს 9 აპრილის ქუჩა. უმრავლესობის დეპუტატებს მოუწიათ, დემონსტრანტების შეძახილებისა და საყვირების ფონზე შესულიყვნენ საკანონმდებლო ორგანოში.

მანამდე: დილის 10:00 საათიდან შეიკრიბნენ რუსული კანონის საწინააღმდეგოდ განწყობილი მოქალაქეები პარლამენტის შენობის უკანა შესასვლელთანაც, მაგრამ ისინი პოლიციამ გაიყვანა.

  • შსს-ს მობილიზებული ჰყავს სპეცრაზმი. ასევე, წყლის ჭავლის მანქანა დგას თავისუფლების მოედანზე.