რა ხდება: გუშინ, 2 მაისს, ღიად ანტიდასავლური განცხადებებით გამორჩეულმა თბილისის მერმა კახა კალაძემ სიტყვიერი შეურაცხყოფა მიაყენა ტელეკომპანია ფორმულას ჟურნალისტს.

• მერმა შეურაცხმყოფელი ლექსიკით გამოხატა აგრესია მას შემდეგ, რაც ჟურნალისტმა ჰკითხა, გამოიყენა თუ არა ხელისუფლებამ რეზინის ტყვიები მშვიდობიანი დემონსტრანტების წინააღმდეგ 1-ელი მაისის ღამეს.
• ორგანიზაცია საქართველოს ჟურნალისტური ეთიკის ქარტია დღეს, 3 მაისს გამოეხმაურა მომხდარს და განაცხადა, რომ გმობს კახა კალაძის მიერ ჟურნალისტის შეურაცხყოფის ფაქტს.

ქარტია: "ჟურნალისტების მიმართ დამამცირებელი მოპყრობა, ქართული ოცნების ხელისუფლების მაღალჩინოსნების მხრიდან, ბოლო წლებია, ტრადიციად იქცა.

• ღირსების შემლახველი, შეურაცხმყოფელი ეპითეტებით გაჯერებული სიძულვილის ენა, რომელსაც ისინი რეგულარულად იყენებენ, საზოგადოების თვალში ჟურნალისტიკის როლის დაკნინებასა და ჟურნალისტების დისკრედიტაციას ემსახურება.
• გარდა იმისა, რომ ამგვარი დამოკიდებულება ხელს უშლის მედიას, ეფექტურად იფუნქციონიროს, ჟურნალისტების მიმართ ძალადობას ახალისებს.
• შედეგად, უკვე გვაქვს ჩინოვნიკებისა და საჯარო მოხელეების მხრიდან ჟურნალისტებზე სიტყვიერი და ფიზიკური ძალადობის არაერთი მაგალითი.
• გახშირდა შემთხვევები, როდესაც ჟურნალისტებს ძალადობრივი ჯგუფების დაუსჯელობით გულმიცემული წევრები ესხმიან თავს.

ამ კონტექსტის გათვალისწინებით, განსაკუთრებით შემაშფოთებელია თბილისის მერისა და პარტია ქართული ოცნების გენერალური მდივნის, კახა კალაძის საქციელი 2 მაისის ბრიფინგზე, რა დროსაც მან შეურაცხყოფა მიაყენა ტელეკომპანია ფორმულას ჟურნალისტს ნუცა ბახუტაშვილს.

• კახა კალაძემ, ოფიციალურ ფეისბუქ გვერდზე გამოაქვეყნა ვიდეო, სახელწოდებით — რადიკალების ჟურნალისტი.
• აღსანიშნავია, რომ ამ ვიდეოში არ მოხვდა ის, თუ როგორ იყენებს ქალაქის მერი არანორმატიულ ლექსიკას ჟურნალისტის მიმართ ბრიფინგის დასრულების შემდგომ. აგრესია მოჰყვა ჟურნალისტის შეკითხვას, რომელიც დაინტერესდა იმით, თუ რატომ მალავენ შსს სამინისტრო და ქალაქის მერი იმ ფაქტს, რომ შსს-მ აქციის დასაშლელად რეზინის ტყვიები გამოიყენა ("არ გერიდებათ, ასე უტიფრად რომ იტყუებით შინაგან საქმეთა სამინისტრო და თქვენ?”).

საქართველოს ჟურნალისტური ქარტია გმობს ჟურნალისტებთან ურთიერთობის ამგვარ სტილს და შეახსენებს თბილისის მერს, რომ მას როგორც მაღალი თანამდებობის პირს, აქვს თმენის ვალდებულება."

კონტექსტი: 1-ელ მაისს, რუსული კანონის საპროტესტო აქციაზე, 9 აპრილის ქუჩაზე, გაუშვეს ცრემლსადენი გაზი და წყლის ჭავლი.

• სპეციალური საშუალებები, მოქალაქეების წინააღმდეგ, გაფრთხილების გარეშე გამოიყენეს.
• დაახლოებით 22:00 საათიდან, შსს მშვიდობიანი დემონსტრანტების წინააღმდეგ დროდადრო იყენებდა წიწაკის სპრეის, ცრემლსადენ გაზს, წყლის ჭავლს. სამინისტრომ თქვა, რომ არ გამოუყენებიათ რეზინის ტყვიები, იმის მიუხედავად, რომ დაშავებულებს სავარაუდოდ, რეზინის ტყვიებისგან მიყენებული დაზიანებები აღენიშნებოდათ.

ჯანდაცვის სამინისტროს ოფიციალური ინფორმაციით, რუსული კანონის საწინააღმდეგო აქციაზე 8 დაშავებულის ჰოსპიტალიზაცია გახდა საჭირო.

• დაშავებულებს აღენიშნებოდათ სხვადასხვა სახის დაზიანებები, მათ შორის: ჭრილობები სახის, თავისა და სხეულის სხვადასხვა ნაწილზე, ასევე — ინტოქსიკაცია და სასუნთქი გზების გართულებები.