ლეგენდარული იაპონური კინოსტუდია, Studio Ghibli, კანის წლევანდელ კინოფესტივალზე განსაკუთრებულ ჯილდოს მიიღებს. ანიმაციურ სტუდიას, რომლის ერთ-ერთი დამფუძნებელი ჰაიაო მიაძაკია, პრესტიჟულ კინოღონისძიებაზე საპატიო ოქროს პალმის რტო გადაეცემა. ეს პირველი შემთხვევაა, როცა ამ ჯილდოს გუნდი მიიღებს. კანის რიგით 77-ე კინოფესტივალი 14 მაისს დაიწყება და 25 მაისამდე გასტანს.

"დიდი პატივი და სიხარულია, რომ ჩვენს სტუდიას საპატიო ოქროს პალმის რტო გადაეცემა", — აღნიშნავს ტოშიო სუძუკი, Studio Ghibli-ის თანადამფუძნებელი, — "მთელი გულით ვუხდი მადლობას კანის კინოფესტივალს. ორმოცი წლის წინ, როცა მე, ჰაიაო მიაძაკიმ და ისაო ტაკაჰატამ Studio Ghibli დავაფუძნეთ, გვსურდა, ბავშვებისა და ყველა ასაკის მოზრდილისთვის მაღალხარისხიანი ანიმაცია შეგვეთავაზებინა. დღეს ჩვენს ფილმებს მთელ მსოფლიოში უყურებენ, ბევრი კი Ghibli-ის მუზეუმს და პარკსაც სტუმრობს, რათა ჩვენს კინოსამყაროში იმოგზაუროს".

"Studio Ghibli-მ ამხელა კომპანიად ქცევამდე დიდი გზა გამოიარა. და, მართალია, მე და მიაძაკი უკვე ხანში შევედით, დარწმუნებული ვარ, სტუდია ახალ გამოწვევებს მიიღებს და გუნდის ხელმძღვანელობით კომპანიის სულისკვეთებასაც შეინარჩუნებს".

Studio Ghibli 1985 წელს დაფუძნდა. მას წინ უსწრებდა მიაძაკის ცნობილი ფილმის, ნაუსიკაა ქარების ხეობიდან, გამოშვება, რომლის პროდიუსერი ისაო ტაკაჰატა გახლდათ. ბოლო ოთხი ათწლეულის განმავლობაში კი, სტუდიამ 20-ზე მეტი სრულმეტრაჟიანი ანიმაციური ფილმი გადაიღო, რომელთა შორისაა პრინცესა კაგუიას ამბავი, ციცინათელების სასაფლაო, ჩემი მეზობელი ტოტორო, ჰაულის მოსიარულე ციხე-კოშკი და მოჩვენებების მიერ გატაცებული. ამ უკანასკნელმა მიაძაკის და Studio Ghibli-ს პირველი ოსკარიც მოუტანა.

მეორე ოსკარი ჰაიაო მიაძაკიმ და სტუდიამ წელს დაიმსახურეს, ფილმისთვის ბიჭი და ყანჩა. "შედევრად" შეფასებული ფილმი, რომელსაც კინოკრიტიკოსებისა და მაყურებლების აღფრთოვანებული გამოხმაურებაც ხვდა წილად, შარშან გამოვიდა. პრემიერამდე ფილმის შესახებ თითქმის ყველაფერი გასაიდუმლოებული იყო, თუმცა, ვრცელდებოდა ინფორმაცია, რომ ეს მიაძაკის უკანასკნელი ნამუშევარი იქნებოდა. ამის მიუხედავად, Studio Ghibli-ის ხელმძღვანელმა განაცხადა, რომ 83 წლის რეჟისორი კარიერის დასრულებას ჯერ არ აპირებს.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...