მოკლედ: პარლამენტის მიმდებარედ, სადაც საპროტესტო აქცია მიმდინარეობს, დიდი რაოდენობით საპოლიციო ძალებია მობილიზებული.

  • აქცია მიმდინარეობს პარლამენტის პლენარული სხდომის პარალელურად, სადაც ქართული ოცნება რუსული კანონის პირველი მოსმენით მიღებისთვის ემზადება.

დეტალები: სულ ცოტა ხნის წინ, გარდა პოლიციელებისა, უკვე გამოჩნდნენ ეკიპირებული სპეცრაზმელები.

  • პარლამენტთან მობილიზებულია წყლის ჭავლის მანქანებიც.

რამდენიმე წუთის წინ, განცხადება გაავრცელა შინაგან საქმეთა სამინისტრომ.

უწყება წერს, რომ მათი სხვადასხვა დანაყოფის თანამშრომლები, "მოვლენების ხელოვნურად ესკალაციის თავიდან არიდების მიზნით, მობილიზებული არიან საკანონმდებლო ორგანოს მიმდებარე ტერიტორიაზე და იცავენ საზოგადოებრივ წესრიგს".

  • სამინისტრო აღნიშნავს, რომ "შეკრებებისა და მანიფესტაციების შესახებ" საქართველოს კანონის შესაბამისად, აკრძალულია ადმინისტრაციული ორგანოს შესასვლელების ბლოკირება.
  • "კიდევ ერთხელ მოვუწოდებთ აქციის ორგანიზატორებსა და წევრებს, რომ პროტესტი გამოხატონ მშვიდობიან ფორმებში, არ დაარღვიონ კანონი და დაემორჩილონ ადგილზე მყოფი პოლიციელების მითითებებს", — წერია განცხადებაში.

რუსთაველის გამზირზე მიმდინარე აქცია მშვიდობიანია.