რა ხდება: მმართველი პარტია ქართული ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

  • ასევე, აგენტებად სურთ გამოაცხადონ არასამთავრობო ორგანიზაციები, რომლებიც ხშირად აქვეყნებენ კვლევებს საქართველოში არსებული მაღალი დონის კორუფციის, ადამიანის უფლებების დარღვევის ფაქტებისა და ხელისუფლების მაღალჩინოსანთა უფლებამოსილების ბოროტად გამოყენების შესაძლო ფაქტების შესახებ.
  • ანალოგიური კანონი უკვე მოქმედებს რუსეთში, რის გამოც საქართველოს ხელისუფლების ეს ინიციატივა ჯერ კიდევ გასული წლის მარტში შეფასდა, როგორც რუსული კანონი.

დეტალები: როგორც პარტია ქართული ოცნების აღმასრულებელი თავმჯდომარე და უმრავლესობის ლიდერი, მამუკა მდინარაძე დღეს, 3 აპრილის დილით გამართულ ბრიფინგზე ამბობს, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".

  • მისი თქმით, ერთადერთი განსხვავება ის იქნება, რომ ტერმინს "უცხოური გავლენის აგენტი" სხვა ტერმინით ჩაანაცვლებენ და გამოყენებული იქნება ტერმინი — "უცხოური ძალის ინტერესების გამტარებელი ორგანიზაცია".
  • კანონპროექტის ყველა სხვა ჩანაწერი უცვლელია.

ფართო სურათში: გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.

  • შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.

7-8 მარტის პროტესტს წინ უძღოდა დამოუკიდებელი ქართული მედიის პროტესტი პარლამენტის შენობაში, კანონპროექტის ბიუროს სხდომის პარალელურად.

მედიაორგანიზაციებმა, მათ შორის On.ge-მ, საერთო განცხადებაც გაავრცელეს, რომელშიც აღნიშნული იყო, რომ:

  • კანონის მიზანია, აღარ ისმოდეს კრიტიკული ხმა;
  • მედიამ და საზოგადოებრივმა ორგანიზაციებმა ვეღარ ასახონ ქვეყანაში არსებული კორუფცია, უსამართლობა და სიღარიბე.
  • ამას ადასტურებს წლების წინ რუსეთში მიღებული ანალოგიური კანონის შედეგები — დაიხურა სამოქალაქო და მედიაორგანიზაციები, ჟურნალისტები კი დევნის მსხვერპლნი გახდნენ.

დამოუკიდებელი მედიების გასული წლის განცხადებიდან: "ჩვენ ვემსახურებით საზოგადოებას და გვაღელვებს ჩვენი ქვეყნის მომავალი.

  • არ ვაპირებთ ამ იარლიყით მუშაობას.
  • შესაბამისად, რუსული კანონის მიღების შემთხვევაში, უარს ვაცხადებთ "უცხოური გავლენის აგენტად" რეგისტრაციაზე. ეს შეურაცხყოფს ჩვენს პროფესიულ ღირსებას."