რა ხდება: ნატოს გენერალური მდივანი 18 მარტს თბილისს ეწვევა.

  • სტოლტენბერგი შეხვდება საქართველოს პრეზიდენტს, სალომე ზურაბიშვილს და პრემიერ-მინისტრს, ირაკლი კობახიძეს.
  • ამის შესახებ წერია ნატოს ოფიციალურ ვებგვერდზე.
  • სტოლტენბერგი არა მხოლოდ საქართველოში, აზერბაიჯანსა და სომხეთშიც ჩავა.
  • სამ ქვეყანაში მისი შეხვედრები 17-დან 19 მარტამდე გაიმართება.

დეტალები: იენს სტოლტენბერგი საქართველოს ეწვევა აზერბაიჯანის შემდეგ.

  • მისი შეხვედრები ბაქოში 17 მარტს დაიწყება.
  • აზერბაიჯანში ჩასვლისთანავე შეხვდება პრეზიდენტს, ილჰამ ალიევს;
  • მეორე დღეს კი — აზერბაიჯანის საგარეო საქმეთა და თავდაცვის მინისტრებს.
  • მინისტრებთან შეხვედრის დასრულების შემდეგ, იენს სტოლტენბერგი თბილისში გამოემგზავრება.

თბილისში, მისი 18 მარტის ვიზიტთან დაკავშირებით მხოლოდ ის ვიცით, რომ ნატოს გენერალურ მდივანს ექნება შეხვედრა საქართველოს პრეზიდენტსა და პრემიერ-მინისტრთან.

19 მარტს საქართველოდან ერევანში გაემგზავრება სომხეთის პრეზიდენტსა და პრემიერ-მინისტრთან შესახვედრად.

კონტექსტი — სტოლტენბერგის გზავნილი საქართველოში ვიზიტის წინ: 14 მარტს, ნატოს გენერალურმა მდივანმა, იენს სტოლტენბერგმა საქართველოს შეახსენა, რომ რეფორმები მნიშვნელოვანია და თქვა, რომ "ახლო მომავალში" ჩამოვა.

ფოტო: Kenzo Tribouillard/AFP/Getty Images

  • "რეფორმები მნიშვნელოვანია", — თქვა მან ბრიფინგზე სამთავრობო იმედის ჟურნალისტის პასუხად და აღნიშნა, რომ ნატოს მთავარი ღირებულებები დემოკრატია და კანონის უზენაესობაა.

  • სტოლტენბერგი: "საქართველო ნატოს ღირებული პარტნიორია. ჩვენ მტკიცედ გვჯერა, რომ საქართველოს, ისევე, როგორც ყველა ქვეყანას, აქვს უფლება, აირჩიოს თავისი გზა.

  • საქართველოში რამდენჯერმე ვარ ნამყოფი და ისევ ვეწვევი ახლო მომავალში, რათა კიდევ უფრო გავაძლიერო ჩვენი პარტნიორობა.

  • საქართველოს მიმართ ჩემი გზავნილია, რომ რეფორმები მნიშვნელოვანია.

  • ნატოს აქვს მთავარი ღირებულებები — დემოკრატია, კანონის უზენაესობა. ამიტომ მნიშვნელოვანია, რომ საქართველო შეესაბამებოდეს ამ სტანდარტებს, როდესაც ის მიიწევს წინ ევროატლანტიკური ინტეგრაციის გზაზე", — განაცხადა ნატოს გენერალურმა მდივანმა.