მოკლედ: ადიგენის მუნიციპალიტეტის მერია, მუსლიმთა სამმართველოს 50 000 ლარს გადაურიცხავს, რითაც ისინი შეძლებენ იყიდონ, ან ააშენონ სახლი, სამლოცველოს და მედრესის მოსაწყობად.

იუსუფ მიქელაძის სახლში არსებული მუსლიმური სალოცავის და მედრესეს გადატანა, ადიგენის მუნიციპალიტეტშივე, სოფელ იჯარეთში იგეგმება.

დეტალები: "ადიგენის მუნიციპალიტეტის მერია, ერთი კვირის ვადაში, დოკუმენტურად მოაგვარებს მუსლიმთა სამმართველოსთვის 50 000 ლარის გადარიცხვის საკითხს", — წერს TOK TV.

  • მხარეებს შორის მოლაპარაკება გუშინ, 12 მარტს შედგა და შეხვედრა 5 საათის განმავლობაში მიმდინარეობდა.
  • შეხვედრას ესწრებოდნენ იუსუფ მიქელაძე, სამცხე-ჯავახეთის მუსლიმთა სამმართველოს ხელმძღვანელი მამუკა ვაშაყმაძე, ოპოზიციონერი დეპუტატი საქართველოს პარლამენტში ტარიელ ნაკაიძე და ადიგენის მერი გოჩა ქიმაძე.

კონტექსტი: იუსუფ მიქელაძის სახლი ადიგენში, მართლმადიდებლებსა და მუსლიმებს შორის დაპირისპირების მიზეზი 8 მარტს გახდა.

ამ სახლში, ბოლო წლებია, ადიგენში მცხოვრები მუსლიმები იკრიბებიან და პარასკევის ლოცვას აღავლენენ.

ათობით პირი იუსუფ მიქელაძის სახლთან მივიდა და მუსლიმებს ლოცვის ჩატარების საშუალება არ მისცა.

  • საპროტესტო აქციის მონაწილეები ამბობდნენ, რომ სახლის, სადაც მედრესეა (მუსლიმანური სასწავლებელი), "მეჩეთად გადაქცევას" და იქ ყოველ პარასკევს ლოცვის ჩატარებას არ დაუშვებდნენ.
  • იუსუფ მიქელაძის სახლთან შეკრებილთა შორის იყვნენ სასულიერო პირებიც.

მსგავსი: ადიგენში ჟურნალისტისთვის ხელის შეშლის ფაქტზე მედიის ადვოკატირების კოალიცია გამოძიებას ითხოვს

8 მარტს, დღის ბოლოს, მხარეები შეთანხმდნენ, რომ სახლი, როგორც მეჩეთი, ფუნქციონირებას აღარ გააგრძელებდა და სიტყვიერი შეთანხმება, ოფიციალურად, 11 მარტს უნდა გაფორმებულიყო, თუმცა, მოლაპარაკება სამშაბათს, 12 მარტს შედგა.

ბოლო ხაზი: ადიგენში მომხდარ დაპირისპირებას გამოეხმაურა სოციალური სამართლიანობის ცენტრი (SJC) და სამოქალაქო პლატფორმა არა-ფობიას.

  • SJC სახელმწიფოს რელიგიის თავისუფლების, რელიგიური თანასწორობის და სოციალური მშვიდობის დასაცავად, ქმედითი ნაბიჯების გადადგმისკენ მოუწოდებს და აღნიშნავს, რომ 8 მარტს მომხდარი არ არის ადიგენის მუნიციპალიტეტში ქართველი მუსლიმი თემის უფლებების შეზღუდვის პირველი შემთხვევა.
  • "ქართველი მუსლიმი თემი უკვე 10 წელზე მეტია ფიზიკური, სოციალური და სიმბოლური ძალადობის, დისკრიმინაციისა და შევიწროების გამოცდილებებს აწყდება" — წერია SJC-ის განცხადებაში.
  • პლატფორმა არა-ფობიას მიხედვით, ამ დრომდე არ გავრცელებულა ინფორმაცია გამოძიების დაწყებასა და რომელიმე პირის დაკავებაზე, მიუხედავად იმისა, რომ იუსუფ მიქელაძის სახლთან გადაღებულ ვიდეო-მასალაში ჩანს შესაძლო დანაშაულის ნიშნები: მუქარა, რელიგიური წესის აღსრულებისთვის უკანონოდ ხელშეშლა და დევნა.