გუშინ, გვიან ღამით, კანუდოს ბარში დაკავებული პირი, გიორგი გიორგიძე თავისუფალია. ადოკატის, გიორგი მახარაძის ცნობით, ექსპერტიზის დასკვნის შედეგად დადგინდა, რომ მისი ჩხრეკის დროს პოლიციის მიერ ამოღებული ნივთიერება ნარკოტიკული საშუალება არ არის.

შინაგან საქმეთა სამინისტრო საქმეს 260-ე მუხლით იძიებდა, რაც ნარკოტიკული საშუალების, მისი ანალოგის, პრეკურსორის ან ახალი ფსიქოაქტიური ნივთიერების უკანონო დამზადება, წარმოება, შეძენა, შენახვა, გადაზიდვა, გადაგზავნა ან გასაღებას გულისხმობს.

თვითმხილველები, გუშინ, აცხადებდნენ, რომ პოლიციელები დაკავებული პირისთვის ნარკოტიკული საშუალების ჩადებას ცდილობდნენ:

"მთელმა კანუდოსმა დაინახა, როგორ მოხსნეს ტიპი მოძრავი ტრანსპორტიდან. უკუღმა ჰყავდათ დაკიდებული, თავს ურტყამდა ძირს. გვაქვს ძალიან საფუძვლიანი ეჭვი, რომ რაღაცის ჩადებას ცდილობდნენ, მაგრამ ამის საშუალება არ მივეცით"; "გადააგდეს მოპედიდან, არც გააჩერებინეს მოპედი, გასაღებიც დაიკარგა. გაჩხრიკეს, საერთოდ ვერაფერი უპოვეს. ძალიან დიდი ხანი იდგნენ, მაგრამ ვერაფერი. საუბარია თეთრ ნივთიერებაზე, რაც არის ქსანაქსი, ანუ დამამშვიდებელი წამალია".