რა ხდება: დღეს 18:00 საათზე საქართველოს მთავრობის კანცელარიასთან გაიმართება აქცია, სახელწოდებით — "შეაჩერეთ ანექსია".

აქციის მონაწილეები აფხაზეთის საოკუპაციო რეჟიმის მიერ რუსეთისთვის ბიჭვინთის აგარაკის გადაცემას გააპროტესტებენ.

ორგანიზატორია "მოძრაობა აფხაზეთისთვის".

რა ელის ბიჭვინთის აგარაკს

ბიჭვინთაში მდებარე სახელმწიფო აგარაკების კომპლექსი, რომელიც 1958-1961 წლებშია აშენებული, რუსეთს 49-წლიანი იჯარით მისცეს.

• შეთანხმებას ეწინააღმდეგებოდა საზოგადოებისა და პოლიტიკოსების ნაწილი, რის გამოც, შეთანხმების რატიფიცირებისთვის ე.წ. პარლამენტმა სხდომა გამთენიისას გამართა.
• "პარლამენტის სპიკერის", ლაშა აშუბას თქმით, რიგგარეშე სხდომას 28 "დეპუტატი" ესწრებოდა. შეთანხმების რატიფიცირებას მხარი 26-მა მათგანმა დაუჭირა.
• პარლამენტის მიერ დამტკიცებულ დოკუმენტს ხელი უკვე მოაწერა ე.წ. პრეზიდენტმა ასლან ბჟანიამ.

რას ითვალისწინებს შეთანხმება

"ეხო კავკაზას" ინფორმაციით,

• 2022 წლის იანვარში გაფორმებული ხელშეკრულების თანახმად, რუსეთის ფედერაციის საკუთრებაში გადაცემული "ობიექტი" მოიცავს მოძრავ და უძრავ ქონებას (გარდა მიწის ნაკვეთებისა და ზღვის მონაკვეთისა). აფხაზური მხარე მას, დოკუმენტის ძალაში შესვლიდან 6 თვის ვადაში, უსასყიდლოდ გადასცემს რუსეთს.
• რუსულ მხარეს 49-წლიანი იჯარით ეძლევა მიწის ნაკვეთები, რომლებზეც მდებარეობს ობიექტი და ობიექტის მიმდებარე ზღვის ფართობი. ყოველი ნაკვეთისთვის ქირას — წელიწადში 1 რუბლს გადაიხდის.
• ამ მიწის ნაკვეთებზე, მოსკოვს უფლება აქვს, აწარმოოს კაპიტალური მშენებლობა, აფხაზურ მხარესთან შეთანხმებით. ნაგებობები რუსეთის საკუთრება იქნება.
• დოკუმენტში ნათქვამია, რომ რუსული მხარე იყენებს ობიექტს, მიწის ნაკვეთებს და ზღვის მონაკვეთს სახელმწიფო ღონისძიებების ჩასატარებლად სახელმწიფო დაცვას დაქვემდებარებული პირების მონაწილეობით, ასევე, მათ დასასვენებლად.
• მხარეები შეთანხმდნენ, რომ დოკუმენტი იდება 49 წლით და ავტომატურად განახლდება შემდგომი 15 წლით, თუ რომელიმე მხარე დოკუმენტის ვადის ამოწურვამდე მინიმუმ 6 თვით ადრე წერილობით არ აცნობებს მეორე მხარეს მისი შეწყვეტის განზრახვის შესახებ.
  ხელშეკრულების შეწყვეტა არ გამოიწვევს მოძრავ და უძრავ ქონებაზე საკუთრების შეწყვეტას.

რა რეაქცია მოჰყვა შეთანხმებას აფხაზეთში

• აფხაზეთის ე.წ. პარლამენტის შენობასთან, ბიჭვინთის აგარაკის რუსეთისთვის გადაცემის შესახებ შეთანხმების რატიფიკაციის მოწინააღმდეგეებმა შეკრება 26 დეკემბრის საღამოს დაიწყეს.
• მანამდე ცნობილი გახდა, რომ საკითხის განხილვა, 28 დეკემბრის ნაცვლად, 27 დეკემბერს გადაწყდა.
• დღეს "ოპოზიციამ" და სამოქალაქო აქტივისტებმა "პარლამენტის" გადაწყვეტილებას სამარცხვინო უწოდეს და მისი გაუქმება მოითხოვეს.
• შეთანხმების მოწინააღმდეგეები საპროტესტო აქციების გამართვას გეგმავენ.

რა თქვეს შეთანხმების შესახებ თბილისში

საქართველოს პრეზიდენტმა, სალომე ზურაბიშვილმა რუსების მიერ საქართველოს მიწების მორიგი მიტაცება და მცოცავი ანექსიის პოლიტიკა დაგმო.

• "ხალხის ძლიერი რეაქცია, რომელსაც ჩვენ ბიჭვინთის აგარაკის გადაცემის გარშემო ვხედავთ, ოკუპაციის პირდაპირი შედეგია.
• მოვუწოდებ საერთაშორისო საზოგადოებას ძლიერი და სასწრაფო რეაგირებისკენ", — დაწერა X-ზე სალომე ზურაბიშვილმა.

საგარეო საქმეთა სამინისტრომ თქვა, რომ ამ შეთანხმების რატიფიკაცია მორიგი უკანონო ქმედებაა და რუსეთის მიერ საქართველოს განუყოფელი რეგიონების ოკუპაციის პოლიტიკას აგრძელებს.

• "საერთაშორისო სამართლებრივი თვალსაზრისით ნებისმიერი მსგავსი სახის ე.წ. შეთანხმება იურიდიული ძალის არმქონე და ბათილია. შესაბამისად აფხაზეთის რეგიონის ოკუპაციის პირობებში ტერიტორიის გადაცემაზე გაფორმებულ ე.წ. შეთანხმებას ვერ ექნება რაიმე სახის სამართლებრივი შედეგი", — წერს საგარეო უწყება.