კატარის ავიახაზების ყოფილი ბორტგამცილებელი ამბობს, რომ არაბულ ქვეყანაში პოლიციამ სახის დამატენიანებლის მოხმარების გამო დააკავა, მოგვიანებით კი იგი სამსახურიდან დაითხოვეს და ქვეყნიდან გააძევეს.

ინდონეზიელი გილბერტ იგნატიუსი ბრიტანულ გაზეთს უყვება, რომ კატარში სამუშაოდ 2016 წელს ჩავიდა. მაისში, როცა კაცი დედაქალაქ დოჰას ერთ-ერთ სასტუმროში დაბადების დღეს იხდიდა, მასთან პოლიციის ორი ოფიცერი მივიდა გასასაუბრებლად. იგნატიუსის თქმით, პოლიციის ოფიცრებმა მას და მის მეგობარს სახე ხელსახოცით მოსწმინდეს და შენიშნეს, რომ ორივეს დამატენიანებელი ჰქონდა წასმული. ამის შემდეგ, კაცი პოლიციის განყოფილებაში გამოკითხვაზე გადაიყვანეს, სადაც, გილბერტის თქმით, უმტკიცებდნენ, რომ იგი პროსტიტუციაში იყო ჩართული. გამოკითხვის დროს იგნატიუსის ტელეფონში ბანგკოკის პრაიდზე გადაღებული ფოტოც აღმოაჩინეს. მას ასევე ჰკითხეს, საიდან ჰქონდა ჰერმესის ბრენდის ჩანთა და ქამარი.

გილბერტი ჰყვება, რომ ორჯერ მოითხოვა ინდონეზიის საელჩოსთან დაკავშირება, მაგრამ პოლიციელებმა განუცხადეს, რომ ის "კატარში იმყოფებოდა და მას არანაირი უფლება არ ჰქონდა".

გაზეთის ცნობით, იგნატიუსს მისთვის უცხო, არაბულ ენაზე შედგენილ აღიარებით ჩვენებაზე მოაწერინეს ხელი. მეორე დღეს იგი კატარის ავიახაზებში დაიბარეს, მისი პასპორტი დაიტოვეს და განუცხადეს, რომ ფრენა ეკრძალებოდა.

რამდენიმე კვირის შემდეგ, გილბერტი და მისი მეგობარი, რომელიც ასევე ავიახაზებში მუშაობდა, კომპანიის წარმომადგენელმა საუდის არაბეთის სასაზღვრო პუნქტთან მიიყვანა, პასპორტები დაუბრუნა და უთხრა, რომ ქვეყნის დასატოვებლად სამი დღე ჰქონდათ.

კატარის ავიახაზები ამბავს არ გამოხმაურებია. კომპანიაში არც მედიის შეკითხვებისთვის უპასუხიათ.

კატარი ქალებისა და ლგბტქ ადამიანების მიმართ დისკრიმინაციული პოლიტიკით გამოირჩევა. ამის გამო ქვეყანაში შარშან გამართულ ფეხბურთის მსოფლიო ჩემპიონატს საპროტესტო ტალღაც მოჰყვა.