რა ხდება: ქალაქ ღაზასთან მდებარე ალ-შიფას საავადმყოფოსთან მომხდარი აფეთქების შედეგად, სულ მცირე, 13 ადამიანი დაიღუპა.

რითი ხსნის ისრაელი თავდასხმას: ისრაელის თავდაცვის ძალებმა (IDF) დაადასტურა, რომ სასწრაფო დახმარების მანქანას მათ დაარტყეს, რადგან, ისრაელის მტკიცებით, მას ჰამასის წევრები იყენებდნენ.

  • IDF-ის ინფორმაციით, დარტყმის შედეგად მოკლეს ჰამასის მებრძოლები და ასევე, განაცხადეს, რომ დაჯგუფება იარაღის გადასატანად სწორედ სასწრაფო სამედიცინო დახმარების მანქანებს იყენებს, თუმცა ჯერჯერობით, ამის დამადასტურებელი მტკიცებულება არ წარმოუდგენია.
  • "ეს ტერიტორია საბრძოლო ზონაა. სამოქალაქო პირებს მუდმივად მოვუწოდებთ ევაკუაციისკენ," - ამბობენ თავდაცვის ძალებში.

რას ამბობს ჰამასის მთავრობა: მათი მტკიცებით, სასწრაფო სამედიცინო დახმარების მანქანებს, რომლებიც ისრაელის სამიზნე გახდა, ალ-შიფას საავადმყოფოდან რაფას მიმართულებით დაჭრილები გადაჰყავდა.

  • რაფადან, დაშავებულები, სამკურნალოდ, ეგვიპტის ტერიტორიაზე შეჰყავთ.
  • ეგვიპტის ჯანდაცვის სამინისტროს ინფორმაციით, ისინი 28 დაჭრილ პაციენტს ელოდებოდნენ, თუმცა ალ-შიფაში განვითარებული მოვლენების გამო, ღაზის სექტორიდან მხოლოდ 17 დაშავებული გადაიყვანეს.

რას ამბობს ჯანდაცვის მსოფლიო ორგანიზაცია: მისი ხელმძღვანელი ალ-შიფაში მომხდარი აფეთქებით შეძრწუნებულია.

  • "კიდევ ერთხელ ვამბობთ, პაციენტები, მედპერსონალი, სასწრაფო დახმარების მანქანები მუდმივად დაცული უნდა იყვნენ, ყოველთვის!" — დაწერა ტედროს ადჰანომ გებრეიესუსმა X-ზე.

რას იხსენებს თვითმხილველი: აფეთქების ადგილას იმყოფებოდა პალესტინელი რეჟისორი, ბისან ოვდა.

  • "რამდენიმე ადამიანმა ფეხები, ხელები დაკარგა, ადამიანები ცდილობდნენ, დაჭრილები გადაეყვანათ. ისინი ტიროდნენ, ცდილობდნენ ერთმანეთი მოეძებნათ," — ჰყვება ოვდა BBC-სთან.
  • გარდა პაციენტებისა, ალ-შიფას, ისრაელის დარტყმებისგან თავს ათასობით ადამიანი აფარებს. რეჟისორი ამბობს, რომ რადგანაც საავადმყოფოში ადგილი აღარ არის, ბევრი პალესტინელი ახლოს მდებარე ქუჩებში ათენებს ღამეებს.

ისრაელმა ღაზის სექტორზე შეტევა 7 ოქტომბერს დაიწყო, მას შემდეგ, რაც ჰამასი თავს დაესხა ისრაელის მშვიდობიან მოსახლეობას, მოკლა 1400-ზე მეტი ადამიანი და ტყვედ აიყვანა 240-ზე მეტი.

ღაზის სექტორში, ისრაელის თავდასხმების შედეგად მსხვერპლი 9 ათასს აჭარბებს, მათი უმეტესობა ქალები, ბავშვები და ასაკოვანი ადამიანები არიან.