თბილისში მელიქიშვილის ქუჩის მიმდებარე ტერიტორიაზე, სადაც რამდენიმე ათეული ბარია, Success Bar ექვსი დღის წინ გაქურდეს. როგორც ბარის მფლობელი ნია გვათუა ამბობს, წაღებულია რამდენიმე ათასი დოლარის ღირებულების სასმელი, ტექნიკური მოწყობილობები და ფული. მისი ინფორმაციით, გამომძიებლები საქმეს "ენთუზიაზმით არ ეკიდებიან", რადგან ბარში ლგბტქ ადამიანები დადიან.

გვათუას თქმით, ის გამომძიებლებმა გააფრთხილეს, რომ მომხდარის შესახებ ინფორმაცია არ გაევრცელებინა, რათა გამოძიებას ხელი არ შეშლოდა.

"კიდევ ერთხელ მივეცი ჩვენება, სადაც პირდაპირ მივუთითე ვისზეც მქონდა საკმაოდ საფუძვლიანი ეჭვი, ამის შემდეგ კი გამომძიებელი არ იღებს ტელეფონს, არც თავად მიკავშირდება. ჩემი ახლობელი, ყოფილი პროკურორი ჩავრიე, რომ საქმე წინ წასულიყო, მას პოლიციის შიდა წრიდან მიუვიდა ინფორმაცია, რადგან ლგბტქ ადამიანები დადიან ამ ბარში, გამომძიებლები დიდი ენთუზიაზმით არ არიან განწყობილებიო," - აცხადებს Success Bar-ის მფლობელი.

მისი თქმით, მას შემდეგ, რაც მისთვის ცნობილი გახდა, რომ საგამოძიებო სამსახური ძარცვის შემთხვევას საფუძვლიანად არ იძიებდნენ გამომძიებელს კიდევ ერთხელ შეეხმიანა და უთხრა, თუ საქმეს არ ყურადღებით არ გამოიძიებდნენ საქმეს სხვა ორგანიზაციებს ჩარევდა. "ამაზე საკმაოდ უხეშად მიპასუხა გამომძიებელმა, აქ მეორედ აღარ დარეკო, ვის ემუქრებიო", - აღნიშნავს გვათუა.

ძარცვასთან დაკავშირებით, ნია გვათუა დღეს, 9 ივლისს Success Bar-ში ღონისძიების - Crime Party-ს მოწყობას გეგმავს.

On.ge-ს ამ საკითხზე შინაგან საქმეთა სამინისტროს პრესსამსახურში განუცხადეს, რომ გამორიცხავენ გამომძიებლის მხრიდან რაიმე უხეშ მოპყრობას, ან რაიმე მიზეზის გამო საგამოძიებო მოქმედებების მიმართ გულგრილობას. მათი ინფორმაციით, საქმეზე გამოძიება "სისხლის სამართლის კოდექსის" 177 მუხლით (ქურდობა) მიმდინარეობს.