გერმანიის დედაქალაქში მცხოვრები ებრაელი მოქალაქეების სახლებზე უცნობმა პირებმა რამდენიმე დღის წინ დავითის ვარსკვლავები გამოსახეს. ჯამში პოლიციამ ოთხ სხვადასხვა შემთხვევაზე მიიღო შეტყობინება, რამაც ბერლინში მცხოვრები ებრაელები თავიანთ უსაფრთხოებაზე დააფიქრა.

"მე ებრაულად ვსაუბრობ, ტელეფონზეც კი, და დავითის ვარსკვლავს ვატარებ", — ამბობს ქალი, რომელსაც გასულ კვირას, სამსახურიდან დაბრუნებულს, სახლის კარზე მიხატული ებრაული სიმბოლო დახვდა, — "მართლა დავფიქრდი, ღირდა თუ არა სახლში დარჩენა".

სამი სხვა შემთხვევიდან ერთზე მაინც ადასტურებს პოლიცია, რომ სახლი ებრაელ მცხოვრებს ეკუთვნოდა. როგორც სამართალდამცავ ორგანოში ამბობენ, ახლა მიმდინარეობს გამოძიება, კავშირშია თუ არა შემთხვევები ერთმანეთთან.

მომხდარი კი უბრალოდ შემთხვევები როდია — გერმანული კანონმდებლობა მსგავს ქმედებას დანაშაულად მიიჩნევს. ქვეყანაში სწორედ მსგავსი შემთხვევებით დაიწყო ებრაელების მასობრივი დევნა 1930-იან წლებში, როცა ნაცისტები ებრაელების მაღაზიებზე დავითის ვარსკვლავს ახატავდნენ და თანამოქალაქეებს ასე მოუწოდებდნენ ბოიკოტისკენ. ეს ბოიკოტი მალევე გადაიზარდა ჯერ ებრაელებისთვის უფლებების ჩამორთმევაში, მოგვიანებით კი მათ დევნაში, დაკავებასა და სიკვდილის ბანაკებში გაგზავნაში.

დღევანდელ ბერლინში მომხდარი ინციდენტები კი, ზოგიერთის აზრით, ისრაელი-ჰამასის ომს შეიძლება უკავშირდებოდეს. თიურინგიის მხარის დაზვერვის ხელმძღვანელი შტეფან კრამერი ამბობს, რომ "ჰამასის მხარდამჭერები გერმანიაში პროტესტს შეიძლება აღარ დასჯერდნენ და ებრაულ თემზე ტერორისტული თავდასხმა განახორციელონ". კრამერი ამატებს, რომ ისრაელში მიმდინარე ომმა, შესაძლოა, "მოქმედებისკენ უბიძგოს სხვა ისლამისტურ დაჯგუფებებსაც, რომლებიც მთელ გერმანიას მუსლიმების მტრად ხედავენ".

იმის მიუხედავად, რომ ჰამასი ევროკავშირმა ჯერ კიდევ 2003 წელს გამოაცხადა ტერორისტულ ორგანიზაციად, გერმანიაში დაჯგუფების საჯაროდ მხარდაჭერა მხოლოდ 2021 წელს აიკრძალა.

ისრაელში მიმდინარე ომის, ასევე ევროპაში მომხდარი ბოლოდროინდელი ტერორისტული თავდასხმების გამო კი, გერმანიაში მეჩეთებთან და ებრაულ სკოლებთან დაცვა გაძლიერებულია.

ასევე იხილეთ: