თბილისის სატრანსპორტო კომპანიის ხელმძღვანელი, ნუგზარ ჭეიშვილის ხელფასი თვეში საშუალოდ შვიდი ათასი ლარია. ეს კომპანიისგან მიღებული იმ ინფორმაციით ირკვევა, რომელიც ჭეიშვილის მიერ 2016 წლის შემოსავლებს ასახავს.

კომპანიიდან On.ge-სთვის მიწოდებული ინფორმაციიდან ირკვევა, რომ ნუგზარ ჭეიშვილმა 2016 წლის პირველი მაისიდან 31 დეკემბრამდე 56 080 ლარი გამოიმუშავა. მისი ყოველთვიური ხელფასი 4 800 ლარია, დანარჩენი 2 210 ლარი კი პრემია ან/და დანამატი. გარდა ამ შემოსავლისა, საჯარო სამსახურის ბიუროდან მიღებული ინფორმაციიდან ირკვევა, რომ ის 2016 წელს, სატრანსპორტო კომპანიის დირექტორობის პარალელურად, შპს georgian invest-ში მრჩევლის თანამდებობას იკავებდა. ამ სამსახურით მან გასულ წელს 15 ათასი ლარი გამოიმუშავა.

რამდენიმე დღის წინ On.ge-მ ნუგზარ ჭეიშვილის შესახებ კიდევ ერთი მასალა მოამზადა. იმ დროისთვის კომპანიის დირექტორი ინფორმაციას არ ასაჯაროებდა. მას ხელფასის შესახებ ინფორმაცია არ აუსახავს არც თანამდებობის პირის დეკლარაციაში, რომლის შევსების ვალდებულებაც აქვს.

თბილისის სატრანსპორტო კომპანიის 100 პროცენტიან წილს თბილისის მერია ფლობს.