რა მოხდა: წყალქვეშა ნავი, რომელსაც ტურისტები ჩაძირულ ტიტანიკთან მიჰყავდა, ატლანტის ოკეანეში 18 ივნისს გაუჩინარდა.

  • ხომალდთან კავშირი წყალში ჩაშვებიდან საათისა და 45 წუთის შემდეგ გაწყდა — ამ დროიდან ფართომასშტაბიანი სამძებრო სამუშაოები მიმდინარეობდა.
  • წყალქვეშა ხომალდი, რომელიც ტურისტულ კომპანია OceanGate-ს ეკუთვნოდა, დაახლოებით, სატვირთო მანქანის ზომის იყო, 5 ადამიანსა და ოთხი დღის სამყოფ ჟანგბადს იტევდა.
  • ბორტზე იმყოფებოდნენ 48 წლის პაკისტანელი მილიარდერი, შაჰზადა დავუდი, მისი 19 წლის შვილი, სულემან დავუდი, 58 წლის ბრიტანელი ბიზნესმენი და მკვლევარი, ჰამიშ ჰარდინგი და 77 წლის ფრანგი მკვლევარი, პოლ-ჰენრი ნარგეოლე.
  • 21-22 ივნისს ოკეანეში გაუჩინარებული წყალქვეშა ნავის ძებნისას ძლიერი ხმაური დააფიქსირეს, რამაც მაშველებს იმედი გაუჩინა.
  • თუმცა, 22 ივნისს აშშ-ის სანაპირო დაცვის სამსახურმა დაადასტურა, რომ ნავზე მყოფი ყველა ადამიანი გარდაცვლილია.

დეტალები: წყალქვეშა დისტანციური მართვის რობოტმა, რომელსაც 4000 მეტრის სიღრმეზე ოპერირება შეუძლია, ჩაძირული ტიტანიკიდან 500 მეტრის მოშორებით ნამსხვრევები დააფიქსირა.

  • სამძებრო-სამაშველო გუნდმა 5 მთავარი ნამსხვრევი შეისწავლა, რაც მათ ნავის იდენტიფიცირებაში დაეხმარა.
  • აშშ-ის სანაპირო დაცვის წარმომადგენელმა თქვა, რომ 5 ადამიანის დაღუპვის მიზეზი, სავარაუდოდ "კატასტროფული აფეთქება" გახდა.
  • "ეს ადამიანები იყვნენ ნამდვილი მკვლევრები, რომლებიც იზიარებდნენ თავგადასავლების გამორჩეულ სულს და ღრმა ვნებას მსოფლიო ოკეანეების გამოკვლევისა და დაცვისადმი. ჩვენი გული ამ ხუთი ადამიანის სულთან და მათი ოჯახის ყველა წევრთანაა ამ ტრაგიკულ დროს", – განაცხადა OceanGate-მა, რომელიც წყალქვეშა ნავს მართავდა.

კატასტროფული აფეთქება: წყალქვეშა აფეთქება გულისხმობს გემის უეცარ შიდა კოლაფსს.

  • ექსპერტების თქმით, ამ სიღრმეებში წყალქვეშა ნავებზე უზარმაზარი ზეწოლაა და ყველაზე პატარა სტრუქტურული დეფექტიც კი შეიძლება, დამღუპველი იყოს.
  • ყოფილი საზღვაო ოფიცერი ამბობს, რომ აფეთქება მილიწამში, ისე სწრაფად მოხდებოდა, სანამ ვინმე "შიგნიდანაც კი მიხვდებოდა, რომ პრობლემა იყო".

შემდეგი ნაბიჯები: დისტანციური მართვის მანქანები დარჩებიან შემთხვევის ადგილზე და გააგრძელებენ ინფორმაციის შეგროვებას ზღვის ფსკერიდან.

  • აშშ-ის სანაპირო დაცვის თქმით, ტიტანის წარუმატებლობის დადგენის "წარმოუდგენლად რთულ" საქმეში მოვლენების კონკრეტული ვადების განსაზღვრას დრო დასჭირდება.
  • თუმცა, სააგენტო საბოლოოდ დაადგენს, რა მოხდა არასწორად და როგორ გაგრძელდება რეაგირება.