საქართველოს საფეხბურთო ნაკრებმა ევრო 2024-ის შესარჩევი ეტაპის მორიგი მატჩი გლაზგოში ჰემპდენ პარკზე გამართა და ჯგუფის ლიდერ შოტლანდიასთან დამარცხდა.

ძლიერი წვიმისა და მთლიანად დატბორილი საფარის გამო, მატჩი მე-6 წუთზე შეწყდა. თუმცა, აქამდე რამდენიმე წამით ადრე, მაკგრეგორმა გოლის გატანა მოასწრო.

ფოტო: Glasgow Live

რთული მეტეოროლოგიური პირობების მიუხედავად, მატჩი, თითქმის 2 საათიანი პაუზის შემდეგ, განახლდა. საქართველოს ნაკრებმა პირველი ტაიმი მძიმედ ჩაატარა და ერთი-ორი მომენტის მიუხედავად, გოლის გატანა ვერ შეძლო.

მეორე ტაიმის დებიუტშივე მასპინძლებმა კიდევ ერთი გოლის გატანა შეძლეს — ეს სკოტ მაკტომინეიმ მოახერხა, რომელსაც მიმდინარე შესარჩევ ციკლში უკვე 5 გოლი უგროვდება. ხვიჩა კვარაცხელიას აქტიურობის შემდეგ, შანსი ლობჟანიძეს ჰქონდა, მაგრამ შოტლანდიელებმა დაცვაში კარგად ითამაშეს. ამას კაკაბაძის ჩაწოდების შემდეგ მიქაუტაძის დარტყმა მოჰყვა, მაგრამ ბურთი, ფაქტობრივად, დაუცველად დარჩენილ კარს ასცდა.

92-ე წუთზე კვარაცხელიამ, ჯარიმის შესრულებისას, რბილი პასი გადასცა ზურიკო დავითაშვილს, რომელთან ორთაბრძოლის დროსაც ჰიკიმ საჯარიმოში ხელით ითამაშა და პენალტი დაინიშნა. თერთმეტმეტრიანი ხვიჩამ შეასრულა და კარს გადააცილა.

ფოტო: The Sun

საბოლოო ჯამში, ვილი სანიოლის ნაკრები დამარცხდა. შოტლანდიამ მსოფლიოსა და ევროპის შესარჩევი ეტაპის საწყისი 4 მატჩში ისტორიაში პირველად მოიგო. შოტლანდიასთან ურთიერთშეხვედრებში საქართველოს ნაკრებს ახლა უკვე უარყოფითი ბალანსი აქვს — 2 მოგება, 3 წაგება.

საქართველოს ბანკი ეროვნული ნაკრების მთავარი სპონსორი და მხარდამჭერია.