შრეკი ჩვენი დროის ერთ-ერთი ყველაზე საკულტო ანიმაციური ფილმია, რომელსაც მოგვიანებით არაერთი გაგრძელება მოჰყვა. სერიის, წესით, ბოლო ფილმი, შრეკი სამუდამოდ, მაყურებელმა 13 წლის წინ იხილა, თუმცა, მას შემდეგ ერთგულ ფანებს მცირე იმედი მაინც ჰქონდათ, რომ ყველაფერი ამით არ დასრულებულა...

... და როგორც ჩანს, ასეც არის! გამოცემა Variety-ის ცნობით, სტუდია DreamWorks Animation შრეკის მე-5 ნაწილის შექმნას გეგმავს და აპირებს, თავდაპირველი სამსახიობო გუნდი დააბრუნოს, მათ შორის, მაიკ მაიერსი, კამერონ დიასი და ედი მერფი.

კინოსტუდიის მფლობელი კომპანია Illumination-ის დირექტორის, კრის მელედანდრის თქმით, მსახიობებთან მოლაპარაკებები ჯერ კიდევ მიმდინარეობს, თუმცა, პროცესს კარგი პირი უჩანს.

კრისი არ ცდება — ედი მერფიმ რამდენიმე თვის წინ განაცხადა, რომ შრეკის კიდევ ერთ ფილმში სიამოვნებით იმონაწილევებდა. მეტიც, თქვა, ჩექმებიანი კატის ნაცვლად აჯობებდა, ვირზე გადაეღოთ ფილმიო.

მერფის სურვილი კი, როგორც ჩანს, მაინც ასრულდება — მელედანდრი ამბობს, რომ ვირის პერსონაჟზე ცალკე ფილმს აუცილებლად გადაიღებენ.

ფოტო: Giphy

შრეკის სამყაროსთან ერთად კი, Illumination სხვა ცნობილი ანიმაციების დაბრუნებაზეც ფიქრობს. მათ შორისაა შინაური ცხოველების საიდუმლო ცხოვრება და Sing.

კინოკომპანიაში სხვა სიახლეებიცაა, თანაც, არა მხოლოდ ფილმების მიმართულებით. სტუდია Despicable Me-ის შემქმნელ პიერ კოფინთან ერთად ორ მინისერიალზე მუშაობს, რომელთა პრემიერაც მაისში შედგება ტიკტოკზე, მოგვიანებით კი მაყურებელი მათ უკვე იუთუბზეც იხილავს.

ასევე იხილეთ: