მთავრობის მეთაურმა, ირაკლი კობახიძემ ჟურნალისტებთან გორში მომხდარ ინციდენტზე საუბრისას განაცხადა, რომ გდდ-ის ყოფილ უფროსს "ზვიად ხარაზიშვილს, მას ეკუთვნოდა ღირსების ორდენი ეკუთვნოდა". კობახიძის განმარტებით, ხარაზიშვილმა, შსს-ს და გდდ-ს სხვა წარმომადგენლებმა "სახელმწიფო ხელისუფლების გადატრიალების მცდელობისგან დაიცვეს" და დასძინა, რომ ხარაზიშვილს არანაირი ძალადობრივი აქტი არ ჩაუდენია.

"რაც შეეხება ზვიად ხარაზიშვილს, მას ეკუთვნოდა ღირსების ორდენი იმის გამო, რომ მან და პოლიციის სხვა წარმომადგენლებმა დაიცვეს ჩვენი სახელმწიფო ხელისუფლების გადატრიალების მცდელობისგან, ძალადობრივი მცდელობისგან. ამის გამო, ზვიად ხარაზიშვილი, ისევე როგორც შსს-ს და გდდ-ს სხვა წარმომადგენლები იმსახურებდნენ სათანადო შეფასებას და დაფასებას. რაც შეეხება ძალადობას, ძალადობას სჭირდება ბუნევრივია სათანადო რეაგირება. იყო კონკრეტული გადაცდომები, კონკრეტული ექსცესები და ამასთან დაკავშირებითაც დადგა პასუხისმგებლობა. ხარაზიშვილის მხრიდან არ იყო არავითარი კონკრეტული ძალადობრივი აქტი, არანაირი ძალადობრივი აქტი არ იყო" — თქვა კობახიძემ.

ტვ პირველის ჟურნალისტის დასმულ შეკითხვაზე, თუ რა აზრის იყო კობახიძე კადრებზე, სადაც ხარაზიშვილი დაკავებულ მოქალაქეს ფიზიკურად უსწორდება, კობახიძემ უპასუხა, რომ ამასთან დაკავშირებით შესაბამის უწყებას მიმართონ.

"შეგვიძლია მივმართოთ ერთად სამართალდამცავ ორგანოებს და ვნახოთ, რასთან გვაქვს რეალურად საქმე, არის თუ არა აქ ისეთი სამართალდარღვევა, რაზეც უნდა ყოფილიყო განსხვავებული რეაგირება, ამაზე შეგვიძლია ყველამ ერთად ვიმსჯელოთ, მაგრამ რაც შეეხება ზვიად ხარაზიშვილის დაჯილდოებას, ის იმსახურებდა ჯილდოს იმის გამო, რომ მან და შსს-ს სხვა წარმომადგენლებმა დაიცვეს ჩვენი სახელმწიფო ხელისუფლების გადატრიალების ძალადობრივი მცდელობისგან," — განაცხადა კობახიძემ.