ევროკავშირმა ჩინური კომპანია Temu €200 მილიონით დააჯარიმა. ამის მიზეზი არალეგალური პროდუქციის, მათ შორის სახიფათო საბავშვო სათამაშოებისა და გაუმართავი დამტენების გაყიდვა გახდა.

ევროკომისიის განცხადებით, კომპანიამ ვერ შეძლო პროდუქტებთან დაკავშირებული რისკებისა და მომხმარებლებისთვის მიყენებული პოტენციური ზიანის იდენტიფიცირება, ანალიზი და შეფასება.

Temu-სთან დაკავშირებით გამოძიება 2024 წლის ოქტომბერში დაიწყო, რათა დადგენილიყო, ასრულებდა თუ არა ის, როგორც დიდი ონლაინ პლატფორმა, ევროკავშირის კანონმდებლობით განსაზღვრულ ვალდებულებებს.

Temu ევროკავშირის გადაწყვეტილებას არ ეთანხმება, ჯარიმას არაპროპორციულად მიიჩნევს და ამჟამად სამართლებრივი რეაგირების გზებს განიხილავს.

ფოტო: Guardian

პლატფორმის პროდუქციის გამოძიებაში დამოუკიდებელი ორგანიზაცია მონაწილეობდა, რომელმაც Temu-დან ნაყიდი ნივთების შემოწმების შედეგად დაადგინა, რომ დამტენების დიდმა ნაწილმა ელექტროენერგიის უსაფრთხოების საბაზისო ტესტები ვერ გაიარა. საბავშვო სათამაშოების დიდი ნაწილი კი უსაფრთხოების რისკებს ავლენდა — ზოგი მათგანი ქიმიური ნივთიერებების დასაშვებ ნორმას აჭარბებდა, ზოგი კი მცირე ზომის ნაწილების გამო დახრჩობის საფრთხეს შეიცავდა.

ჯარიმის გადახდის გარდა, Temu-მ 28 აგვისტომდე უნდა წარადგინოს გამოვლენილი ხარვეზების აღმოსაფხვრელი სამოქმედო გეგმა. ამის შემდეგ კომისიას კომპანიის მიერ მიღებული ზომების შესაფასებლად 2 თვე ექნება.

Temu-ს წარმომადგენელმა განაცხადა, რომ კომპანია პატივს სცემს მკაფიო და თანმიმდევრული წესების არსებობას, თუმცა აღნიშნავს, რომ ევროკავშირის გადაწყვეტილება 2024 წლის მონაცემებს ეფუძნება და მათი პროდუქციის ამჟამინდელ მდგომარეობას არ ასახავს.