საქართველოს პარლამენტის თავმჯდომარის, ირაკლი კობახიძის თქმით, ვენეციის კომისიამ დაადასტურა, რომ საქართველოს ახალი კონსტიტუციის პროექტი კონსტიტუციურ სამართალთან თანხვედრაშია. ამის შესახებ კობახიძემ რამდენიმე წუთის წინ გამართულ ბრიფინგზე განაცხადა.

მისი თქმით, ვენეციის კომისიის რეკომენდაციებს სრულად გაითვალისწინებენ და ამ რეკომენდაციების განხილვა საქართველოს პარლამენტში გაგრძელდება. კობახიძე ამბობს, რომ მათ ვენეციის კომისიას კონსტიტუციის პროექტთან დაკავშირებით საბოლოო დასკვნის ოქტომბერში მიწოდება სთხოვეს.

"ჩვენ გვინდოდა ჩამოგვეყალიბებინა ძალიან დემოკრატიული საპარლამენტო მმართველობის სისტემა და ამას ცხადყოფს ვენეციის კომისიის შესაბამისი დასკვნა. შესაბამისად, ჩვენ ვართ აბსოლუტურად პირნათელი ჩვენი საზოგადოების წინაშე. ჩვენ ვცვლით ძალიან დაუხვეწავ, არადემოკრატიულ კონსტიტუციას ძალიან დახვეწილი და დემოკრატიული კონსტიტუციით. ეს იყო ჩვენი მიზანი, ჩვენი პოლიტიკური ნება, ჩვენი ამოცანა და ეს ამოცანა სრულდება," - აღნიშნა კობახიძემ.