ამის შესახებ მათ სოციალურ ქსელში დაწერეს.

რატომ არის მნიშვნელოვანი: ისინი ომბუდსმენის მოადგილის პოსტს 2018 წლიდან იკავებდნენ. იყვნენ არაერთი მნიშვნელოვანი ანგარიშის ავტორები და ხელისუფლების კრიტიკის სამიზნეები.

  • ბურჯანაძე მონაწილეობდა ომბუდსმენის შესარჩევ კონკურსშიც, თუმცა პარლამენტმა მის არჩევას მხარი არ დაუჭირა.

გიორგი ბურჯანაძის თქმით, არ ისაუბრებს იმ მიზეზებზე, რის გამოც აპარატში მუშაობას ვეღარ გააგრძელებს, თუმცა წერს, რომ ასეთი ფაქტორი უამრავია.

  • "ლევანს არჩევის დღესვე ვუთხარი, რომ მარტის ბოლომდე შემეძლო მხოლოდ დარჩენა აპარატში, რადგან დასასრულებელი იყო საპარლამენტო ანგარიში და სხვა მიმდინარე საქმეები".
  • ამბობს, რომ, მიუხედავად სახელმწიფო პროპაგანდისა და თავდასხმებისა, ომბუდსმენის აპარატს მხოლოდ ერთი ამოცანა ჰქონდა — ყველა გაჭირვებული და უფლებადარღვეული ადამიანის პრობლემის გამოვლენა და შესაბამისი სახელმწიფო ორგანოსთვის მიმართვა.
  • "დღეს, როცა საჯარო სამსახურს ვასრულებ, ვარ ამაყი. 2018 წელს დავისახე მიზნად, რომ ბავშვური გულწრფელობით მეკეთებინა ყველაფერი ჩემი შესაძლებლობის მაქსიმუმის ფარგლებში და რაღაც დოზით, ვფიქრობ, გამომივიდა. ყოველდღიურად უამრავი ადამიანი მხვდება ქუჩაში, რომელიც მადლობას მეუბნება საქმიანობის გამო".
  • ომბუდსმენის ყოფილი მოადგილე წერს, რომ საჯარო სამსახურის გაგრძელება უნდოდა, თუმცა უარი რუსული კანონის ავტორებმა უთხრეს.
  • მისივე თქმით, ბოლო ანგარიში მისი ავტორობით მომავალ კვირას გამოქვეყნდება.

ეკატერინე სხილაძე ამბობს, რომ ადამიანის უფლებების სფეროში დარჩება.

  • ყოველთვის ჩემთან იქნება სიამაყის განცდა იმ ცვლილებების გამო, რასაც კოლეგებთან ერთად მივაღწიეთ. არ დავწერ, როგორი რთული დრო გავიარეთ, რამდენი უძილო ღამე, დარდი და ბრძოლა, თუმცა, ერთი წუთითაც არ ვნანობ განვლილ გზას და მიღებულ გადაწყვეტილებებს. პირიქით, კიდევ ერთხელ გავივლიდი იმ შეგრძნებებისთვის, რაც თან მიმაქვს", — დაწერა მან.