ერთიანი ნაციონალური მოძრაობის წევრმა, რომან გოცირიძემ დღეს, პარლამენტის პლენარულ სხდომაზე ტრიბუნასთან გამოსვლისას განაცხადა, რომ საზოგადოებრივი მაუწყებლის ახალ მენეჯმენტს ღირებულებითი კრიზისი აქვს და სწორედ ამიტომ დახურა გოგი გვახარიასა და სალომე ასათიანის გადაცემები:

"სალომე ასათიანი გადაცემა თავისუფლებისკენ მოწოდებაა. სალომე ასათიანისა და გოგი გვახარიას მსგავსი ადამიანები ქმნიან დღეს საქართველოში ევროპულ ღირებულებებს, შემოაქვთ თავისუფლების ცნებები, და არა ისეთი, რაც გაბატონებულია ჩვენს საზოგადოებაში, მათ შორის შავრაზმული ჰომოფობიური, დისკრიმინაციული შეხედულებები. ამიტომ დახურეთ, თორე როდის იყო ისინი მიტინგს უწყობდნენ ივანიშვილს".

13 ივნისს ცნობილი გახდა, რომ საზოგადოებრივ მაუწყებელზე სალომე ასათიანის ინტერVIEW და გოგი გვახარიას წითელი ზონა ივლისის შუა რიცხვებიდან აღარ გავა. მაუწყებლის სტრატეგიული სამსახურის უფროსი, ია ანთაძე ამბობს, რომ მომავალი სეზონიდან მაუწყებლის ეთერში მხოლოდ კონკურსის წესით შერჩეული ან საკუთარი რესურსით დამზადებული გადაცემები მოხვდება. საზოგადოებრივი მაუწყებლის მიმდინარე და ახალი ამბების ბლოკის დირექტორმა, გიორგი გვიმრაძემ კი On.ge-ს უთხრა, რომ რადიო თავისუფლებამ მაუწყებლისგან ხელშეკრულებების ვადის ამოწურვის შესახებ მიიღო წერილი, თუმცა გაგრძელდება თუ არა გადაცემები, გვიმრაძეს კონკრეტული პასუხი არ აქვს.