ბოლო 10 წლის განმავლობაში, მოვლენები საქართველოს პოლიტიკურ სივრცეში საოცრად მონოტონურია. თითქმის ნებისმიერი პროტესტი, რომელიც მიმართულია მთავრობის ან სახელმწიფო უწყებების მიმართ, მომენტალურად არის დისკრეტირებული ხელისუფლების წარმომადგენლების მიერ. მაგალითად შეგვიძლია მოვიყვანოთ 2007 წლის საპროტესტო აქციები, რომლის ერთ-ერთი მხარდამჭერი თქვენც იყავით ქალბატონო სალომე. იმდროინდელი მთავრობა, მისი წარმომადგენლები და ნაციონალური მოძრაობის მხარდამჭერები ოპოზიციურ ძალებს, საპროტესტოდ გამოსულ ადამიანებს, რუსეთის აგენტებად ან რუსული პროპაგანდის მიერ კონტროლირებად ჯგუფებად მოიხსენიებდა.

დღეს ერთგვარი დეჟა-ვუ მაქვს, რადგან ფაქტობრივად იგივე მოვლენას ვაკვირდები. ოღონდ ამჯერად ქართველი ხალხის ბუა, საპარლამენტო უმცირესობა, ნაციონალური მოძრაობაა. ბოლო მაჟორიტარულ არჩევნებში, პატივცემულმა ბიძინა ივანიშვილმა ისიც განაცხადა, რომ ნაციონალური მოძრაობა არჩევნების გაყალბებას ცდილობდა. თუ ვინმე სადმე რამე მშენებლობას აპროტესტებს, იქნებიან ეს პარტიზანი მებაღეები ან სხვა „მწვანეები“, ხელისუფლება თითს ისევ ნაციონალური მოძრაობისკენ იშვერს. დღეს თქვენც არ ჩამორჩით ტრენდს და გუშინდელი საპროტესტო აქცია საქართველოს ბუას და „სხვა პოლიტიკურ თამაშს“ მიაწერეთ.

ეს თქვენი [სალომე ზურაბიშვილის] პოზიციაა, ახლა მოდით ლოგიკურად ვიმსჯელოთ;

მიშკა მგალობლიშვილი და გიორგი ქებურია დაიჭირეს სხვადასხვა ადგილზე, ერთმანეთისგან დამოუკიდებლად. მათ ორივეს, ერთდროულად აღმოაჩნდათ დიდი დოზით MDMA, რომელიც რატომღაც ორივეს ჯიბით დაჰქონდა.

მაინტერესებს ქალბატონო სალომე, რამდენი ადამიანი იცით ან რამდენის შესახებ გსმენიათ ან უბრალოდ აბსტრაქტულად რას ფიქრობთ, რატომ უნდა დადიოდეს ორი ახალგაზრდა, რომლებმაც ძაან კარგად იციან, როგორი საშიშია საქართველოში ნარკოტიკების შენახვა-მოხმარება, ჯიბე-გამოტენილი ნარკოტიკის შეკვრით. არ არის ეს უცნაური?

მაგრამ კარგით, დავუშვათ მართლა დაჰქონდათ ჯიბით MDMA. მაინც, ამ ორ ადამიანს, დაკავების შემდეგ ერთმანეთთან არ ულაპარაკიათ და არანაირი კავშირი არ ჰქონიათ. ამის მიუხედავად, ორივე ერთი და იგივე ამბავს ყვება (როგორც უკვე ვთქვი ერთმანეთისგან დამოუკიდებლად). მგალობლიშვილიც და ქებურიაც ამბობენ, რომ მათ ფიზიკურად გაუსწორდნენ, შეურაცხყოფა მიაყენეს. ამასთანავე უთხრეს, რომ კლიპი არ უნდა გადაეღოთ, კლიპი უნდა წაეშალათ და რომ მუსიკალური ვიდეოსთვის დაისჯებიან.

თქვენ შეიძლება იფიქროთ, რომ ეს ორი ადამიანი წინასწარ შეთანხმდა ნარატივზე. ანუ დასხდნენ და გადაწყვიტეს, რომ თუ ნარკოტიკის გამო დაიჭერდნენ, ერთი და იგივე ისტორია მოეყოლათ. თუ ეს ასეა და ორი ახალგაზრდა ასეთი ფრთხილია, რაშიც ძალიან მეპარება ეჭვი, მაშინ რატომ დაჰქონდათ დიდი დოზით MDMA ჯიბით. დღისით, მზისით. ელემენტარული ლოგიკაა საკმარისი იმისთვის, რომ მივხვდეთ რაოდენ „სუსტი“ და არალოგიკურია ეს ჰიპოთეზა.

ამის გარდა, ორივეს ჩაუტარეს ნარკო-ტესტირება. იძულებით მოაშარდინეს, აიღეს მათი პირის ღრუს ლორწოვანას ნაცხი. რომელმაც დაადგინა, რომ დაკავებული პირები არათუ არ იყვნენ ნარკოტიკული ზეგავლენის ქვეშ, მათ ნარკოტიკები ბოლო თვის განმავლობაშიც არ მიუღიათ. ეს დამატებით ეჭვს აჩენს დებულებაში, რომ მგალობლიშვილს და ქებურიას ჯიბით დაჰქონდათ MDMA. ისევ ვიმეორებ, ამის მისახვედრად მხოლოდ ელემენტარული ლოგიკაა საჭირო, რომლითაც თქვენ რატომღაც არ სარგებლობთ.

ახლა მოდით თქვენი სკეპტიციზმი აგორებული პროტესტისადმი უფრო აბსტრაქტულად განვიხილოთ;

პირველ რიგში, თქვენ გამოთქმულ მოსაზრებას არანაირი ფაქტით ან არგუმენტით არ ასაბუთებთ. არადა ხალხისთვის არგუმენტირებული ინფორმაციის მიწოდება თქვენი, როგორც ხალხის მიერ არჩეული პოლიტიკოსის პირველი მოვალეობაა. იმის მტკიცებით, რომ საპროტესტო მუხტს ამ ქვეყანაში საპარლამენტო უმცირესობა მართავს, შეურაცხყოფას აყენებთ თითოეულ ადამიანს, რომელიც ამ საპროტესტო აქციაზე იყო მოსული. მინდა შეგახსენოთ ქალბატონო სალომე, რომ ხალხს აქვს არაჩვეულებრივი თვითორგანიზაციის უნარი. ამ აქციაზე თქვენ იხილავდით ოცნების მხარდამჭერებს, ნაციონალური მოძრაობის მხარდამჭერებს, კომუნისტებს, ანარქისტებს, მორწმუნეებს, ათეისტებს და ა.შ... ყველანაირი რწმენის და მსოფლმხედველობის ადამიანებს, რომლებიც გაერთიანდნენ ერთი მიზნით, რომლებმაც ჩათვალეს, რომ პოლიციის ნარატივი არ არის ლოგიკური.

ბოლო დროს, საქართველოში არაერთხელ აგორდა საპროტესტო ტალღა. წელს, თუ დააკვირდებით ნახავთ, რომ განსაკუთრებით აქტიურია ახალგაზრდული ფრთა და ისინი მხოლოდ ნარკოპოლიტიკას არ აკრიტიკებენ. ბევრი მათგანი ითხოვს შრომითი უფლებების გაუმჯობესებას, ბევრი მათგანი მოითხოვს ტყეების გაკაფვას, პარკებში მშენებლობის შეჩერებას და ა.შ. ყველა ეს ადამიანი, ყველა ეს დაჯგუფება ერთვება პოლიტიკურ ცხოვრებაში, აფიქსირებს თავის აზრს. ეს არის დემოკრატია და ეს უნდა იყოს დემოკრატია. იქამდე, სანამ ფაქტს არ მომიყვანთ, რომ მე იმ აქციაზე იმიტომ მივედი, რომ ნაციონალურმა მოძრაობამ მაცდუნა, მანამდე მექნება განცდა, რომ თქვენ ნამდვილად არ ჩამოუვარდებით ზემოთხსენებულ პარტიას შეთქმულების თეორიებით.

თქვენ ბედავთ და ასკვნით, რომ ბოლო ხუთი წლის განმავლობაში, სახელმწიფო უწყების მიერ უსამართლოდ არავინ დასჯილა და არავინ დაჩაგრულა. არ ვიცი ქალბატონო სალომე რატომ არ იცით, რომ ნებისმიერი მთავრობა და ნებისმიერი ცენტრალური სისტემა განწირულია ჩაიდინოს უსამართლო ქმედებები. მთავრობა პოლიციელებს და სამართალდამცავებს აკისრებს უზარმაზარ პასუხისმგებლობას და ამასთანავე აძლევს მათ უზარმაზარ ძალაუფლებას. რატომ გგონიათ შეუძლებელი, რომ ათასობით პოლიციელიდან და სამართალდამცავიდან, რამდენიმე მაინც გამოჩნდება ისეთი, ვინც სახელმწიფოსგან მინიჭებულ ძალაუფლებას ბოროტად გამოიყენებს, ვიღაცას ნარკოტიკს ჩაუდებს და ვიღაცას თვითმკვლელობამდე მიიყვანს არ მესმის.

ყველაფერთან ერთად, თქვენ ამტკიცებთ, რომ „ნარკოპოლიტიკა და ლიბერალიზაცია სხვა საკითხია ამ ცალკე ფაქტთან არ უნდა იყოს დაკავშირებული...“

როგორ ამბობთ ასეთ რაღაცას, როდესაც თქვენივე ნარატივიდან გამომდინარე, ეს ორი ახალგაზრდა სწორედ ნარკოტიკის შენახვა და/ან მოხმარების გამო დაიჭირეს. პოლიტიკოსების პასუხისმგებლობაა, ყველა განცხადება გაამყარონ არგუმენტებით და ფაქტებით, მაგრამ სამწუხაროდ არცერთი პოლიტიკოსი არ მეგულება, ვინც ამ პასუხისმგებლობას ასრულებს.

პატივისცემით,

ნაციონალური მოძრაობის მიერ ტვინგამორეცხილი, სხვა პოლიტიკური თამაშის მსხვერპლი, ახალგაზრდა