ერთიანი ნაციონალური მოძრაობა აფგან მუხტარლის გატაცებასთან დაკავშირებით, შს მინისტრის, გიორგი მღებრიშვილის, სუს-ის ხელმძღვანელის, ვახტანგ გომელაურისა და განათლების მინისტრის, ალექსანდრე ჯეჯელავას გადაყენებას მოითხოვს:

"ეს და ყველა ასეთი სამარცხვინო და დანაშაულებრივი ფაქტი ყველანაირ პერსპექტივას უსპობს ჩვენს ქვეყანას და არსებითად აზიანებს საქართველოს იმიჯსა და პოზიციებს საერთაშორისო არენაზე."

აღნიშნული პირების თანამდებობაზე დარჩენის შემთხვევაში ენმ მთელი მთავრობის გადაყენებით იმუქრება:

"თუ დასახელებული თანამდებობის პირები არ გადადგებიან დაკავებული თანამდებობიდან, ან მათ არ გადააყენებს კვირიკაშვილი, ჩვენ ენმ მივაღწევთ, მთელი მთავრობის გადაყენებას ჩვენ მთავარ მოკავშირე და თანამებრძოლ, ქართველ ხალხთან ერთად."

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.