სერიალ Stranger Things-ის მსახიობი ნოა შნაპი 11 წლის იყო, როცა პირველად მოექცა საზოგადოების ყურადღების ცენტრში Netflix-ის შოუში უილ ბაიერსის როლის შესრულებით. წლების განმავლობაში მისი ცნობადობა და პოპულარობა კიდევ უფრო გაიზარდა და მსახიობს უკვე 27 მილიონი გამომწერი ჰყავს ინსტაგრამზე, ხოლო 31 მილიონი — ტიკტოკზე.

პოპკულტურაზე ნოას გავლენის გაზრდა მის შემოსავალზეც აისახა და, როგორც ცნობილია, განსხვავებით სერიალის პირველი სეზონისა, რომლის დროსაც ეპიზოდში $20 000-ს იღებდა, ახლა თითოეულ ეპიზოდში $250 000-ს უხდიან. ნოას ქონება ამჟამად $3 მილიონადაა შეფასებული, თუმცა მის პოპულარობასა და შთამბეჭდავ შემოსავალს 18 წლის მსახიობისთვის, როგორც ჩანს, ჩვეულებრივი ცხოვრების ხიბლი არ დაუვიწყებია.

წარმატებული სამსახიობო კარიერის მიუხედავად, ნოამ უნივერსიტეტში ჩაბარება და განათლების მიღებაც გადაწყვიტა და ნეტფლიქსმა მისი ვიდეოც გააზიარა, რომელშიც მსახიობი დაუფარავ აღტაცებას გამოხატავს პენსილვანიის უნივერსიტეტში ჩარიცხვასთან დაკავშირებით.

ახლახან კი ნოას ახალი ვიდეო გავრცელდა, რომელშიც მსახიობს $50-ის მოგებას სთავაზობენ უნივერსიტეტში, თუ 5 ეკონომიკასთან დაკავშირებულ კითხვას უპასუხებს.

"5 კითხვას დაგისვამ, რომლებიც თანდათანობით გართულდება. ხუთივეს თუ გამოიცნობ, $50-ს მოიგებ, თუ 1-იდან 4-ის ჩათვლით გამოიცნობ — $10-ს," — შესთავაზეს მსახიობს. ნოა $50-ის მოგების პერსპექტივამ აშკარად გაახარა და 5 კითხვიდან 4-იც გამოიცნო.

ფოტო: youtube

საბოლოოდ, მსახიობმა $10 მოიგო, რაც იმ თანხის 0,004%-ია, რასაც მას Stranger Things-ის თითოეულ ეპიზოდში უხდიან, თუმცა მაინც ძალიან გახარებული ჩანდა.

ნოას ახალი ვიდეო, რა თქმა უნდა, მისმა გულშემატკივრებმაც დეტალურად განიხილეს და საკუთარი აზრიც ღიად დააფიქსირეს.

ფოტო: TikTok

"გეფიცებით, სულ ავიწყდება, რომ სელებრითია,"— წერდა მისი ერთ-ერთი გულშემატკივარი TikTok-ზე.