აზერბაიჯანი უარყოფს ბრალდებებს სომხური დასახლებების დაბომბვის შესახებ. თავდაცვის სამინისტრო აცხადებს, რომ "კონტრზომები ადგილობრივი ხასიათისაა და მიმართულია ლეგიტიმური სამხედრო სამიზნეების წინააღმდეგ".

რატომ არის მნიშვნელოვანი: 2020 წლის 10 ნოემბერს, 40-დღიანი ომის შემდეგ, სომხეთმა, აზერბაიჯანმა და რუსეთმა სამშვიდობო შეთანხმებას მოაწერეს ხელი, რომლის მიხედვითაც სომხეთს აზერბაიჯანისთვის ტერიტორიების გადაცემა მოუწია, ხოლო ლაჩინში შეიქმნა დერეფანი, სადაც "რუსი სამშვიდობოები" განლაგდნენ.

• ამის შემდეგ ცეცხლის შეწყვეტის შეთანხმება არაერთხელ დაირღვა და სხვადასხვა მონაცემით, მეორე ომის დასრულების შემდეგ, რამდენიმე ასეული ადამიანი დაიღუპა.
• 12 სექტემბერს დილით გავრცელდა ინფორმაცია, რომ აზერბაიჯანულმა მხარემ ცეცხლი გაუხსნა მთიან ყარაბაღის ორ დასახლებას — კარმირ შუკასა და თაღავარდს.
• თავის მხრივ, აზერბაიჯანის თავდაცვის სამინისტრო ამტკიცებდა, რომ სომხეთის შეიარაღებული ძალები რამდენიმე დღეა აზერბაიჯანის პოზიციების მიმართულებით ისვრიან, რასაც სომხეთის უარყოფდა.
• საღამოს კი ცნობილი გახდა, რომ აზერბაიჯანი სომხეთის 3 ქალაქს ინტენსიურად ბომბავს.

აზერბაიჯანი სომხეთის მხრიდან პროვოკაციაზე და დეზინფორმაციაზე საუბრობს, დაბომბვაზე გავრცელებულ ინფორმაციას კი სისულელეს უწოდებს.

• თავდაცვის სამინისტროს ცნობით, სომხეთის შეიარაღებული ძალების დივერსიულმა ჯგუფებმა სიბნელეში, მთიანი რელიეფისა და ხეობების გამოყენებით, დანაღმეს ტერიტორიები აზერბაიჯანის პოზიციებსა და მომარაგების გზებს შორის.
• "ჩვენი ქვედანაყოფების მიერ ამ ქმედებების აღსაკვეთად გადაუდებელი ზომების შედეგად, მოხდა სამხედრო შეტაკება", — განაცხადეს სამინისტროში და დასძინეს, რომ სომხურ მხარეს პერსონალის დანაკარგები აქვს და სამხედრო ინფრასტრუქტურაც დაზიანდა.
• გარდა ამისა, ბაქო უარყოფს ინფორმაციას მათი თვითმფრინავის ჩამოგდების შესახებ.

სომხეთი კი აცხადებს, რომ აზერბაიჯანის შეიარაღებული ძალების ქვედანაყოფებმა საარტილერიო საშუალებებიდან და მსხვილკალიბრიანი შაშხანებიდან ინტენსიური სროლა დაიწყეს სომხეთის პოზიციებზე გორის, სოტკისა და ჯერმუკის მიმართულებით.

• გარდა ამისა, რადიო თავისუფლების სომხური ბიურო წერს, რომ სომხეთ-აზერბაიჯანის საზღვარზე მყოფი რამდენიმე თემის, მათ შორის სიუნიკის, ვაიოც ძორისა და გეღარქუნიკის რეგიონის მცხოვრებლები სროლისა და დაბომბვის შესახებ იტყობინებიან.
• გამოცემას სოფელ ვერინ შორჟას გამგებელმა განუცხადა, რომ აზერბაიჯანის არმიამ "ინტენსიური ცეცხლი გახსნა".

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება მსოფლიოში.