ამის შესახებ უკრაინის პრეზიდენტი CNN-ს ესაუბრა.

რატომ არის მნიშვნელოვანი: ზელენსკიმ განაცხადა, რომ ეს მხოლოდ პუტინზეა დამოკიდებული და შესაძლოა, ყველაფერი "მის შემდეგ" დასრულდეს. თუმცა იქვე აღნიშნა:

  • "შეიძლება ასეც იყოს: ის ისევ იქნება მმართველი და ომი დასრულდება... პრინციპში, ვფიქრობ, ეს მისთვის ერთადერთი შანსია ამ მდგომარეობიდან გამოსასვლელად".

დეტალები: ვოლოდიმირ ზელენსკიმ განაცხადა, რომ უკრაინა არ დათანხმდება მინსკის შეთანხმებების არცერთ ვერსიას.

  • "ჩვენ ერთ ადგილას არ დავდგებით. ნელ-ნელა მუდმივად ვივლით წინ. მათ სხვანაირად აღარ დაველაპარაკებით. როგორც კი გავჩერდებით და დავდგებით, ვიცი, ზოგიერთი სახელმწიფო გვიბიძგებს "მინსკის პროცესისკენ"
  • "დიპლომატიური გადაწყვეტილება და "მინსკი"-2-3-5-10 — ეს სხვა რამეა. "მინსკი" ცარიელი ქაღალდია, რათა რუსეთმა დაისვენოს შემდეგ შეჭრამდე".

გარდა ამისა, ზელენსკიმ 10 სექტემბერს ხაზგასმით აღნიშნა, რომ ომის დასრულებამდე რუსეთის ფედერაციასთან მოლაპარაკება შეუძლებელია, რადგან რუსული მხარე ვერავითარ ადეკვატურ პოზიციებს ვერ ჩამოაყალიბებს.

  • "არ მაინტერესებს ვინ წამოაყენა ეს ულტიმატუმები, პუტინმა თუ ვინმე სხვამ. ეს არის ჩემი პრინციპი: არ დაველაპარაკები მათ, ვინც ულტიმატუმებს მიყენებს" — განაცხადა მან.
  • პასუხად, რუსეთის ყოფილმა პრეზიდენტმა, დმიტრი მედვედევმა თქვა, რომ ეს ულტიმატუმები მხოლოდ მოთელვაა და რუსეთის საბოლოო მოთხოვნა "კიევის რეჟიმის კაპიტულაციაა".

ფართო სურათში: აქამდე ზელენსკიმ არა ერთხელ შესთავაზა პუტინს პირისპირ შეხვედრა, წინასწარი პირობების გარეშე, თუმცა ის უარზე იყო — კრემლი ამბობდა, რომ "ჯერ ადრეა".

  • ქვეყნებს შორის მოლაპარაკებები რამდენიმე თვეა არ გამართულა, უკრაინა სამშვიდობო შეთანხმებაზე საუბარს მხოლოდ მას შემდეგ გეგმავს, რაც რუსეთი ოკუპირებულ ტერიტორიებს დატოვებს.
  • ამ ეტაპზე უკრაინა წარმატებულ კონტრშეტევას აწარმოებს ხერსონისა და ხარკოვის ოლქების მიმართულებით — უკვე გაათავისუფლეს არაერთი ქალაქი და დასახლება, რუსული ჯარები კი უკან იხევენ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება მსოფლიოში.