მედია ინფორმაციას კრემლთან დაახლოებულ ორ წყაროზე დაყრდნობით ავრცელებს.

რატომ არის მნიშვნელოვანი: რუსეთი რეფერენდუმების ჩატარებას ე.წ. დონეცკისა და ლუგანსკის რესპუბლიკებში, ასევე, ზაპოროჟიეში, ხარკოვსა და ხერსონში აპირებდა.

  • თარიღი ოფიციალურად გამოცხადებული არ იყო, თუმცა რუსი მაღალჩინოსნის თქმით, სიმბოლური იქნებოდა, რომ "რუსეთთან შეერთების" ე.წ. რეფერენდუმები 4 ნოემბერს, რუსეთის ეროვნული ერთიანობის დღეს ჩაეტარებინათ.

დეტალები: წყაროებმა Meduza-ს განუმარტეს, რომ ამ გადაწყვეტილების ერთადერთი მიზეზი ხარკოვის მიმართულებით უკრაინის წარმატებული კონტრშეტევა გახდა.

  • მათი თქმით, პირები, რომლებიც ე.წ. რეფერენდუმზე ხარკოვსა და ზაპოროჟიეში მუშაობდნენ უკვე გაიწვიეს რუსეთში, ხოლო ხერსონში კვლავ რჩებიან;
  • მედიის ცნობით, თარიღი განუსაზღვრელი ვადით გადაიდო და კრემლში არ იციან, როდის დაუბრუნდებიან თარიღის ხელახლა განხილვებს — მათი თქმით, ეს უკრაინის კონტრშეტევაზე იქნება დამოკიდებული.

კონტრშეტევის ბოლო ცნობები: 10 სექტემბერს ცნობილი გახდა, რომ უკრაინამ გაათავისუფლა ქალაქი კუპიანსკი და მიიწევდა იზიუმისკენ.

  • არსებული ინფორმაციით, ოკუპანტები ამ დროისთვის ტოვებენ იზიუმს და იქ უკრაინული დროშა ბრუნდება;
  • ლუგანსკის რეგიონის ადმინისტრაციის განცხადებით, უკრაინელი სამხედროები უკვე იმყოფებიან ლისიჩანსკის გარეუბანში;
  • სამხედრო ადმინისტრაციის უფროსის ხელმძღვანელმა, სერგეი გაიდაიმ გამოაქვეყნა პოსტი, სადაც მიანიშნებდა ლისიჩანსკის სწრაფი დეოკუპაციის შესახებ.

ISW ამბობს, რომ 5 დღეში უკრაინამ იმაზე მეტი ტერიტორია გაათავისუფლა, ვიდრე რუსეთმა აპრილის შემდეგ დაიპყრო.

  • მათი განცხადებით, უკრაინის შეიარაღებულმა ძალებმა რუსული ხაზები 70 კილომეტრის სიღრმით გაარღვიეს და 6 სექტემბრის შემდეგ, ბოლო 5 დღეში 3 000 კვადრატულ კილომეტრზე მეტი დაიკავეს.