ბრიტანეთის დაზვერვის განცხადებით, უკრაინამ ბოლო 24 საათში ხარკოვის რეგიონში მნიშვნელოვან წარმატებას მიაღწია.

რატომ არის მნიშვნელოვანი: 29 აგვისტოს სამხრეთის მიმართულებით უკრაინა შეტევაზე გადავიდა და მას შემდეგ მნიშვნელოვან წარმატებებს აღწევს.

  • უკრაინის თავდაცვის სამინისტროს ინფორმაციით, ფრონტის ხაზი ამჟამად 2,5 ათას კმ-ზეა გადაჭიმული, აქედან 1,3 ათას კილომეტრზე აქტიური საომარი მოქმედებები მიმდინარეობს.

დეტალები: მათი თქმით, რუსეთმა, დიდი ალბათობით, ამ ტერიტორიიდან ჯარები გაიყვანა, თუმცა ბრძოლა სტრატეგიულად მნიშვნელოვანი იზიუმისა და კუპიანსკის გარშემო გრძელდება.

  • დაზვერვა საუბრობს ვლადმიერ პუტინის განცხადებაზეც და უარყოფს, რომ აგვისტოს შემდეგ ექსპორტირებული მარცვლეულის დიდი ნაწილი ევროკავშირის ქვეყნებში გაიგზავნა;
  • "პუტინის ნათქვამი სიმართლე არ არის. გაეროს მონაცემებით, დაახლოებით, 30% მიეწოდა დაბალი და საშუალო შემოსავლის მქონე ქვეყნებს აფრიკაში, ახლო აღმოსავლეთსა და აზიაში".

ბოლო ცნობები: 10 სექტემბერს ცნობილი გახდა, რომ უკრაინამ გაათავისუფლა ქალაქი კუპიანსკი და მიიწევდა იზიუმისკენ.

  • არსებული ინფორმაციით, ოკუპანტები ამ დროისთვის ტოვებენ იზიუმს და იქ უკრაინული დროშა ბრუნდება;
  • ლუგანსკის რეგიონის ადმინისტრაციის განცხადებით, უკრაინელი სამხედროები უკვე იმყოფებიან ლისიჩანსკის გარეუბანში;
  • სამხედრო ადმინისტრაციის უფროსის ხელმძღვანელმა, სერგეი გაიდაიმ გამოაქვეყნა პოსტი, სადაც მიანიშნებდა ლისიჩანსკის სწრაფი დეოკუპაციის შესახებ.

ISW ამბობს, რომ 5 დღეში უკრაინამ იმაზე მეტი ტერიტორია გაათავისუფლა, ვიდრე რუსეთმა აპრილის შემდეგ დაიპყრო.

  • მათი განცხადებით, უკრაინის შეიარაღებულმა ძალებმა რუსული ხაზები 70 კილომეტრის სიღრმით გაარღვიეს და 6 სექტემბრის შემდეგ, ბოლო 5 დღეში 3 000 კვადრატულ კილომეტრზე მეტი დაიკავეს.