ადამიანის უფლებების სწავლებისა და მონიტორინგის ცენტრმა (EMC), შინაგან საქმეთა სამინისტროში გაასაჩივრა გადაწყვეტილება, აზერბაიჯანელი ჟურნალისტის საქართველოში შემოშვებაზე უარის შესახებ. საჩივრის მოთხოვნაა მიღებული გადაწყვეტილების ბათილად ცნობა "მისი თვითნებური და დისკრიმინაციული შინაარსის გამო".

სახელმწიფოს გადაწყვეტილება არსებითად დისკრიმინაციული იყო და განპირობებულია საქართველოს მთავრობის პოლიტიკური ლოიალობით აზერბაიჯანის ხელისუფლების მიმართ.

EMC

EMC ამტკიცებს, რომ შინაგან საქმეთა სამინისტროს გადაწყვეტილება, გადაადგილების თავისუფლებისა და პირადი ცხოვრების ხელშეუხებლობის უფლების დარღვევასთან ერთად, ჟურნალისტის გამოხატვის თავისუფლებაში თვითნებური ჩარევაც არის:

"უარის დასაბუთების არარსებობის პირობებში ჩნდება ლეგიტიმური ვარაუდი, რომ სახელმწიფოს გადაწყვეტილება არსებითად დისკრიმინაციული იყო და განპირობებულია საქართველოს მთავრობის პოლიტიკური ლოიალობით აზერბაიჯანის ხელისუფლების მიმართ".

EMC იცავს აზერბაიჯანელი ჟურნალისტის, ჯამალ ალის ინტერესებს საქმეზე, რომელიც 2017 წლის 19 აპრილს, შინაგან საქმეთა სამინისტროს მიერ საქართველოს ტერიტორიაზე შემოსვლაზე სავარაუდო დისკრიმინაციული მოტივით უარს უკავშირდება:

"არსებობს დასაბუთებულ ვარაუდი, რომ საქართველოში ჯამალ ალის შემოშვებაზე უარი, Meydan TV-ში მის ჟურნალისტურ საქმიანობას, უფრო ზუსტად კი, 2017 წლის იანვარში აზერბაიჯანის სახელმწიფო ნავთობის კომპანიის, სოკარის მიმართ მის მიერ გაკეთებულ კრიტიკულ სიუჟეტს უკავშირდება.

კერძოდ, MeydanTV-ს მიერ 2017 წლის 16 იანვარს გამოქვეყნდა ჯამალ ალის მომზადებული სიუჟეტი, რომლის ძირითად მიზანს წარმოადგენდა აზერბაიჯანის სახელმწიფო ნავთობის კომპანიის, სოკარის განსხვავებული პოლიტიკის ჩვენება საქართველოსა და აზერბაიჯანში.

აზერბაიჯანის სოფლებში და ბაქოსთან ახლოს მდებარე საცხოვრებელ რაიონებში დიდ პრობლემას წარმოადგენს ბუნებრივი აირის მიწოდება მოსახლეობისთვის, რის გამოც მოსახლეობის დიდი ნაწილს ზამთარში გათბობასთან დაკავშირებით პრობლემები ექმნება. სიუჟეტის მიზანს წარმოადგენდა, იმის ჩვენება, რომ აზერბაიჯანის სახელმწიფო ნავთობის კომპანია სოკარი იმის ნაცვლად, რომ საკუთარი რესურსები აზერბაიჯანში არსებული პრობლემების მოგვარებაზე მიმართოს, საქართველოში არსებულ საკულტო ნაგებობების დიდ ნაწილს გაზით უფასოდ ამარაგებს. აღნიშნული სიუჟეტის შემდგომ, 2017 წლის 29 მარტს, თბილისში გარკვეულმა ადამიანებმა გამართეს საპროტესტო აქცია, რომლის ძირითად მოთხოვნას წარმოადგენდა MeydanTV-სა და ჯამალ ალის საქმიანობის აკრძალვა საქართველოს ტერიტორიაზე. საპროტესტო აქციის შემდგომ, პირველივე ვიზიტის განხორციელებისთანავე, ჯამალ ალის საქართველომ, თბილისის საერთაშორისო აეროპორტში, დაუსაბუთებული უარი უთხრა შემოსვლაზე".

2017 წლის 19 აპრილს Meydan.Tv-ს აზერბაიჯანელი ჟურნალისტი ჯამალ ალი, რომელიც თბილისის საერთაშორისო აეროპორტში ჩამოფრინდა, თბილისში დაგეგმილი სამსახურეობრივ შეხვედრებზე დასასწრებად, საქართველოს ტერიტორიაზე არ შემოუშვეს.

ჯამალ ალისთვის საქართველოში შემოსვლაზე უარის თქმის ოფიციალურ საფუძველს საქართველოს კანონმდებლობით გათვალისწინებული სხვა შემთხვევები წარმოადგენს.

Meydan.Tv აზერბაიჯანულენოვანი ონლაინ მედია პლატფორმაა, რომელიც გერმანიაში დაფუძნდა. Meydan.Tv ალიევის ხელისუფლების მიმართ კრიტიკულადაა განწყობილი და აქტიურად აშუქებს აზერბაიჯანში სახელისუფლებო კორუფციის საკითხებს, რის გამოც მითითებული მედია პლატფორმის თანამშრომელთა დიდი ნაწილი, მათ შორის ჯამალ ალიც, საკუთარი საქმიანობის გამო, პოლიტიკური და განსხვავებული შეხედულების ნიშნით იდევნებიან აზერბაიჯანის ხელისუფლების მიერ და აღნიშნულის გამო სხვა ქვეყნებში უწევთ ცხოვრება.

Meydan TV ფარავს, როგორც აზერბაიჯანში, ასევე რეგიონში მიმდინარე მოვლენებს სამ ენაზე, აზერბაიჯანულ, ინგლისურ და რუსულ ენებზე.

EMC-ის ინფორმაციით, ჯამალ ალის საქართველოში ხშირად უწევდა სამსახურეობრივი და პირადი ვიზიტების განხორციელება, რის გამოც ის არაერთხელ ყოფილა საქართველოში და 2017 წლის 19 აპრილის ვიზიტამდე რაიმე პრობლემა საქართველოს საზღვრის კვეთასთან დაკავშირებით არ შექმნია.