ქართული ოცნების თავმჯდომარის აზრით, ოკუპირებული ცხინვალის რეგიონში "რეფერენდუმზე" ანატოლი ბიბილოვის განცხადებებს, იგნორირება უნდა გავუკეთოთ. მისი თქმით, რაც მეტ ყურადღებას მივაქცევთ დე ფაქტო პრეზიდენტის, განცხადებებს, მით უფრო უკეთესი იქნება მისთვის.

"ამ ყველაფერს აქვს ე.წ წინასაარჩევნო მიზანი. ე.წ არჩევნები ტარდება ე.წ სამხრეთ ოსეთში და ზუსტად წინასაარჩევნო კამპანიის მიზნებისთვის კეთდება ხოლმე ასეთი განცხადებები და ესეც არის პირდაპირ კავშირში ე.წ არჩევნებთან. რაც უფრო მეტ ყურადღებას მივაქცევთ ჩვენ განცხადებებს, რომელსაც ჩვენ ბუნებრივია არალეგიტიმურად ვცნობთ და ვაღიარებთ, მით უკეთესი იქნება განცხადების ავტორებისთვის. ამიტომ, უმჯობესია განსაკუთრებული ყურადღებით არ მოვეკიდოთ იმ განცხადებებს, რომლებიც უკავშირდება არალეგიტიმურ რეფერენდუმს, არალეგიტიმურ და სხვა არჩევნებს მოვლენებს. [...]

აი აბსოლუტურად ყველა განცხადება არის ე.წ წინასაარჩევნო კამპანიასთან, რომელსაც ატარებს ბიბილოვი. იგივე, ეს მუშტების ქნევაც არის დაკავშირებული, რომ ვიღაცას მოუსმინონ ცხინვალის რეგიონში და მეტი მოტივაცია ჰქონდეს, რომ მხარი დაუჭიროს ბიბილოვის კანდიდატურას. რაც მეტ ყურადღებას მივაქცევთ ამ განცხადებებს, მით უკეთესი იქნება განცხადების ავტორებისთვის, ამიტომ ჯობია იგნორირება გავუკეთოთ", — ამბობს ის.

მას შემდეგ, რაც საქართველოს ოკუპირებული რეგიონის დე ფაქტო პრეზიდენტმა, ანატოლი ბიბილოვმა განაცხადა, რომ რუსეთთან შეერთებისთვის მალე ზომებს მიიღებდა, მათ ოფიციალურ გვერდზე პროპაგანდისტული შინაარსის სხვადასხვა განცხადება გავრცელდა, მათ შორის, იმაზე, რომ რუსეთთან გაერთიანებაზე რეფერენდუმი დაიგეგმება. ე.წ. რეფერენდუმი რუსეთისთვის ნაცადი ხერხია — იგივე მეთოდები გამოიყენეს უკრაინაში, როდესაც ანექსირებული ყირიმი რუსეთის ნაწილად გამოაცხადეს.

ე.წ. სახელმწიფო სააგენტო რესზე გამოქვეყნდა პარლამენტის სპიკერისა და ე.წ. პრეზიდენტის პრესსპიკერის განცხადებები. პარლამენტის სპიკერის თქმით, ე.წ. რეფერენდუმი უახლოეს მომავალში ჩატარდება და რუსეთთან შეერთებაზე ხალხი საკუთარ აზრს გამოთქვამს. მისივე განცხადებით, არანაირი სამართლებრივი წინააღმდეგობა არ არსებობს, რომ საქართველოს ოკუპირებული რეგიონი რუსეთს შეუერთდეს.