იუსტიციის მინისტრის მოადგილემ, ბექა ძამაშვილმა საგანგებო ბრიფინგზე თქვა, რომ სტრასბურგმა განსახილველ საქმეთა სიიდან ამორიცხა ყოფილი პრეზიდენტის, მიხეილ სააკაშვილის საჩივარ. მისი თქმით, ამ გადაწყვეტილებით დადასტურდა, რომ საქართველოს პენიტენციურ სისტემაში მიხეილ სააკაშვილის მკურნალობა და მის მიმართ მოპყრობა სრულ შესაბამისობაშია ევროპული სასამართლოს მიერ დადგენილ სტანდარტებთან.

იუსტიციის სამინისტროს ამ განცხადებას სააკაშვილის ადვოკატმა, ნიკა გვარამიამ სამარცხვინო ტყუილი უწოდა.

"ადამიანის უფლებათა ევროპულმა სასამართლომ განსახილველ საქმეთა სიიდან ამორიცხა მიხეილ სააკაშვილის საჩივარი, რომელიც შეეხებოდა პენიტენციურ სისტემაში მის მკურნალობას და მის მიმართ მოპყრობას. კერძოდ, სტრასბურგის სასამართლოს შეფასებით, ამ საქმეში არ არსებობს რაიმე განსაკუთრებული გარემოება ადამიანის უფლებების დაცვის თვალსაზრისით, რომლის გამოც საჭირო იქნებოდა საკითხის დამატებითი შესწავლა.

შესაბამისად, ამ გადაწყვეტილებით კიდევ ერთხელ დადასტურდა, რომ საქართველოს პენიტენციურ სისტემაში მიხეილ სააკაშვილის მკურნალობა და მის მიმართ მოპყრობა სრულ შესაბამისობაშია ევროპული სასამართლოს მიერ დადგენილ სტანდარტებტან და მისი უფლებები და ინტერესები არის სრულად დაცული", — თქვა ძამაშვილმა ბრიფინგზე.

მინისტრის მოადგილემ ბრიფინგზე ასევე თქვა, რომ როდესაც სტრასბურგი გადაწყვეტილებას იღებდა, ხელმძღვანელობდა, ერთის მხრივ, საქართველოს მთავრობის მიერ მიწოდებული ინფორმაციით და მასალებით, ხოლო მეორეს მხრივ, თავად მომჩივნის მიერ გაგზავნილი ინფორმაციით და მასალებით.

ბრიფინგის შემდეგ ნიკა გვარამიამ პოსტი დაწერა და თქვა, რომ ეს არის "სამარცხვინო ტყუილი" და მალე გააკეთებენ განცხადებას.

"იუსტიციის მინისტრიც ვიყავი და საერთაშორისო სამართალიც ვისწავლე აშშ-ში. ასეთ სამარცხვინო და ბრტყელ ტყუილებს ამბობდეს იუსტიციის სამინისტრო და თან სტრასბურგის სასამართლოს აბრალებდეს იმას, რაც არ გაუკეთებია, მე არ მსმენია", —დაწერა მან.

24 მარტს, ჟურნალისტებს იუსტიციის მინისტრმა რატი ბრეგაძემ განუცხადა, რომ ადამიანის უფლებათა ევროპულ სასამართლოში არსებითი განხილვის ეტაპზე გადადიოდა საქმე "სააკაშვილი საქართველოს წინააღმდეგ".