თურქეთის პრეზიდენტის, რეჯეფ თაიფ ერდოღანის განცხადებით, სატელეფონო საუბარში თავის რუს კოლეგას, ვლადიმერ პუტინს მოუწოდებს უკრაინის პრეზიდენტთან, ვოლოდიმირ ზელენსკისთან ერთად დონბასისა და ყირიმის რეგიონის საკითხის მოსაგვარებლად ნაბიჯი გადადგას.

სტამბულში ჟურნალისტებთან საუბრისას მან აღნიშნა, რომ პუტინთან განაახლებს შეთავაზებას, რომ თურქეთმა რუსეთისა და უკრაინის პრეზიდენტების მშვიდობიან მოლაპარაკებებს უმასპინძლოს.

ერდოღანმა პუტინი და ზელენსკი მოსალაპარაკებლად თურქეთში 17 მარტს მიიწვია. 25 მარტს მან თქვა, რომ ორ ქვეყანას შორის რამდენიმე საკითხზე კონსესუსი თითქმის მიღწეულია, თუმცა ყირიმსა და დონბასთან დაკავშირებით უკრაინის დათანხმება შეუძლებელია. ამავე დღეს უკრაინის საგარეო საქმეთა მინისტრმა, დმიტრო კულებამ განაცხადა, რომ თურქეთის პრეზიდენტის ნახსენებ 4 პუნქტში შეთანხმება არ მიღწეულა.

მისივე თქმით, მოლაპარაკების პროცესი ძალიან მძიმედ მიმდინარეობს და მრავალი საკითხი განიხილება. მინისტრი აცხადებს, რომ უკრაინული დელეგაცია მკაცრ პოზიციაზეა და საკუთარ მოთხოვნებზე უარს არ ამბობს.