ქართული ოცნების დეპუტატის, სოზარ სუბარის განცხადებით, არ ელოდებიან მომენტს, როცა იარაღით შეეცდებიან ტერიტორიული მთლიანობის აღდგენას. ასე ეხმაურება ისა ალექსეი დანილოვის მიმართვას, სადაც აღნიშნა, რომ რუსეთის ინტერესების სფეროში სხვა ფრონტების გახსნა, მათ დაეხმარებოდა.

"მინდა კიდევ ერთხელ ყველას გასაგონად და განსაკუთრებით, ოკუპირებულ ტერიტორიებზე მცხოვრები ჩვენი თანამოქალაქეების გასაგონად ვთქვა, რომ საქართველოს ხელისუფლების და ქართველი ხალხის მტკიცე და მკაფიოდ გამოხატული ნებაა, რომ საქართველოს ტერიტორიული მთლიანობის აღდგენის გზა, მხოლოდ და მხოლოდ, მშვიდობაზე გადის. ესაა პოლიტიკა, რომლიდან გადახვევაც ჩვენი ქვეყანა არ აპირებს.

ოკუპირებულ ტერიტორიებზე მცხოვრები ჩვენი თანამოქალაქეებიც, აფხაზი, ოსიც და ნებისმიერი ეროვნების მოქალაქე უნდა დარწმუნდეს, რომ ჩვენ არ ველოდებით ხელსაყრელ მომენტს, როცა იარაღით შევეცდებით ტერიტორიული მთლიანობის აღდგენას. ისინი უნდა დარწმუნდნენ, რომ ეკონომიკურად წარმატებულ, დემოკრატიულ საქართველოში ცხოვრება მათთვის უფრო მომგებიანია. უნდა დარწმუნდნენ, რომ საქართველოა ის ქვეყანა, სადაც ყველაზე წარმატებულად შეუძლიათ თავისი თვითმყოფადობა შეინარჩუნოთ, თავისი კულტურა განავითარონ და საკუთარი შვილების წარმატებული მომავალი უზრუნველყონ. სწორედ ეს არის ქვეყნის გამთლიანების ერთადერთი გზა და საქართველო ამ გზიდან არასოდეს გადაუხვევს", — თქვა მან.

დანილოვის განცხადება უკრაინსკა პრავდამ გაავრცელა. მან აღნიშნა, რომ უცნობია, როგორ განვითარდება სიტუაცია, მაგრამ თუ გაიხსნება მე-2 ფრონტები ისეთ ტერიტორიაზე, რომლითაც რუსეთი დაინტერესებულია და რომელიც ხელოვნურად, თავადვე შექმნა საკუთარი ნაბიჯებით, მაშინ ეს, აუცილებლად, დაეხმარება უკრაინას.

დანილოვის განცხადება ომში ჩართვისკენ პირდაპირ მოწოდებას არ შეიცავს. მან მხოლოდ ის აღნიშნა, რომ კონკრეტულ ტერიტორიებზე ფრონტები უკრაინას დაეხმარებოდა.

ამას გამოეხმაურნენ ქართული ოცნების დეპუტატები და მას "მიუღებელი და შოკისმომგვრელი" უწოდეს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში